مالیه وزیرلیگی یولگه قوییلگن خبری بیر ییغین‌ده ایتگن که، افغانستان بیر قطار چیت ایل مملکت‌لر و تشکیلات‌لردن ۱.۴ میلیارد دالر قرضدار دیر. اوشبو وزیرلیک رسمی‌لری نینگ ایتیش‌لریچه، اوتگن بیر ییل‌ده قرض‌لریدن ۶.۱ میلیون دالری نی توللگنلر.
مذکور ییغین‌ده مالیه وزیرلیگی نینگ خزینه‌لر عمومی رئیسی نصرت‌الله محمود نینگ ایتیشیچه، اسلامی امارت نینگ قدرت گه ایریشگنیدن کیین، اوشبو وزیرلیک تشقی مملکت‌لر و نهاد‌لردن هیچ پول قولگه کیلتیرمه‌گن و مذکور قرض‌لر جمهوریت‌دن قالگن قرض‌لر دیر.
بیزلرنینگ فیسبوک صحیفه‌میزگه باش اورینگ!
شونده‌ی بیرحالده، مالیه وزیرلیگی نینگ درآمد‌لر عمومی رئیسی معراج‌محمد معراج نینگ ایتیشیچه، اوشبو وزیرلیک اوتگن بیر ییل‌ده ۱۵۱ میلیارد افغانی درآمد قیلگن و اوندن بویان افغانستان ده تشقی مملکت‌لر یاردم‌لری گه نیاز ایمس. اونینگ کوپه‌یتیریشیچه، سابق حکومت‌ده مالیه وزیرلیگی، اینگ فاسد نهاد‌لردن حساب‌لنه‌ر ایدی؛ بیراق اولر نینگ سعی و حرکتی سبب، مذکور نهاد فساد‌دن اوزاق‌لنگن.
باشقه بیر تامان‌دن، مالیه وزیرلیگی سوزلاوچیسی احمد‌ولی حقمل متقاعد‌لر خصوصیده ایتگن که، ۴ میلیون بودجه اولر گه اختصاص بیریلگن و تیزلیککه بوتون متقاعد‌لر گه پرداخت بولیشی ممکن.
بیزلرنینگ توییترده هم تعقیب قیلینگ!
افغانستان ده اسلامی امارت نینگ قدرت گه ایریشگنیدن بویان، بیرینچی مرته دیر که اوشبو مملکت بودجه‌سی اوز ایچکی درآمد‌لریدن تامین بوله‌دی.
بوندن آلدین مالیه وزیرلیگی مملکت نینگ مکمل بودجه‌سی نی ۲۳۱ میلیارد افغانی اعلام قیلگن ایدی.