د اوکراین ولسمشر ولودمیر زېلنسکي له کاناډا غوښتنه کړې چې د روسیې پر وړاندې جګړه کې تر بریا د اوکراین ترڅنګ ودرېږي.
زېلنسکي دغه څرګندونې پرون جمعه د سپټمبر ۲۲مه د کاناډا پارلمان ته د وینا پر مهال کړې دي.
د سلاموطندار پښتو فېسبوکپاڼه وڅارئ
نوموړي په خپله وینا کې ویلي چې کاناډا په تېرو جګړو کې د «تاریخ روښانه لوري» ته وه او په وینا یې، دې جګړه کې یې د زرګونو کسانو د ژغورنې لپاره مرستې کړې دي.
زېلنسکي د جګړې له امله دغه هېواد کې د اوکرایني پناهغوښتونکې د مېشتېدو له امله له کاناډا مننه کړې.
د ګارډین راپور له مخې، پر اوکراین د روسيې له برید وروسته دا لومړی ځل دی چې زېلنسکي د کاناډا په بلنه دغه هېواد ته سفر کوي. د یاد سفر موخه د روسیې پر وړاندې د لوېدیځ د ملاتړ راجلبول ښودل شوي دي.
نوموړي د کاناډا لومړي وزیر ته په خطاب کې ویلي: «زه تاسو ته د اوکراینیانو له لوري تاوده سلامونه لرم. تاسو د جګړې په ډګر کې موږ سره مرسته کړې او زموږ تر بریا له موږ سره پاتې شئ.»
د کاناډا لومړي وزیر جسټن ټرډوو له زېلنسکي سره د لیدنې پر مهال ویلي، دغه کتنه له دې امله وه چې وښايي له اوکراین سره په کلکه ولاړ دي.
هغه د راتلونکو درېوو کلونو لپاره په کاناډا کې د جوړېدونکو ۵۰ ټانکونو لپاره د اضافي مرستې لپاره د ۶۵۰ میلیونه کاناډايي ډالرو د مرستې اعلان هم وکړ.