د ملګرو ملتونو د کډوالو عالي کمېشنرۍ UNHCR ویلي، افغانستان او پاکستان کې د وروستیو نښتو له امله وضعیت ترینګلی دی.
دغه بنسټ تېره ورځ یوه راپور کې ویلي چې په دواړو هېوادونو کې د روانو نښتو له امله ګڼ شمېر خلک بېځایه شوي.
د راپور لهمخې، افغانستان کې شاوخوا ۱۱۵ زره او په پاکستان کې نږدې ۳ زره کسان د خپلو کورونو پرېښودو ته اړ شوي.
د ملګرو ملتونو د کډوالو عالي کمېشنرۍ له ښکېلو خواوو غوښتي چې ملکي وګړو ته دې د ځانونو د خوندي کولو په موخه له کرښې د اوښتلو اجازه ورکړل شي.
تر دې وړاندې افغانستان کې د ملګرو ملتونو سیاسي استازولۍ یوناما د افغانستان او پاکستان ترمنځ د نښتو د پایته رسولو غوښتنه کړې او د ملکي تلفاتو او بشري اغېزو د زیاتوالي خبرداری یې ورکړی وو.
یوناما د حوت په ۱۲ / مارچ درېیمه یوه اعلامیه کې ویلي وو چې دغه نښتې د افغانستان د بشري وضعیت د لاخرابیدو لامل کیږي.
یوناما همدارنګه له ټولو اړخونو غوښتي چې د نړیوال بشري قانون په ګډون د نړیوال قانون تر چتر لاندې خپلو ټولو مکلفیتونو ته غاړه کیږدي او د ملکي وګړو خوندیتوب یقیني کړي.
د اسلامي امارت مسوولانو هم ویلي وو چې پاکستان، په کندهار، ننګرهار، کونړ، خوست، پکتیکا او پکتیا ولایتونو کې د جګړې پرمهال ملکي سیمې په نښه کړي دي.