د ونزویلا ولسمشر نیکولاس مادورو پر امریکا سختې نیوکي کړي او ادعا یې وکړه چې واشنګټن د نوموړي حکومت پر وړاندې د «جګړې په اړه جعلي ادعاوې جوړوي.»
الجزیرې خبري شبکې نن یکشنبه، اکتوبر ۲۶مه راپور ورکړی چې مادورو، د کارابین سمندر ته د امریکا د بیړیو نږدېکېدل، د ډونالډ ټرمپ د «دائمې جګړې» د پیل نښه بللې ده. مادورو دغه ګام د امریکا د «ناسمو او جنایي روایتونو» په توګه یاد کړي دي.
پنټاګون د دې عملیاتو هدف د «نارکو تروریزم» پر ضد مبارزه او د هغو ترانس ملی جرمونو سازمانونو لهمنځه وړل بللي چې د امریکا او د هیمسفیر امنیت ته ګواښ دی.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
په دې ترڅ کې، امریکا په کارابین سمندر کې د شکمنو مخدره توکو قاچاق وړونکو پر وړاندې بریدونه کړي چې لږترلږه ۴۳ کسان پهکې وژل شوي دي.
د ټرمپ ادارې د مادورو پر وړاندې د ۵۰ میلیونه ډالرو انعام اعلان کړی، هغه مادورو د «ترهګرۍ شبکې» مشر ګڼي؛ خو مادورو دغه تورونه بېبنسټه بللي او ویلي یې دي چې ونزویلا هېڅکله کوکاین نه تولیدوي.
بلخوا مادورو د مخالف سیاستوال لیوپولدو لوپیز تابعیت لغوه کولو لپاره قانوني ګامونه پورته کړي، هغه په دې تورنوي چې د امریکا د پوځي مداخلې ملاتړ کوي. د دې ټولو ترڅنګ، په سیمه کې د امریکا د پوځ پراخ شتون هم وضعیت کړکېچ کړی دی.