په افغانستان کې د ماشومانو لپاره د ملګروملتونو ملاتړې ادارې (یونېسف) مشر تاجالدین اویواله خبرداری ورکړی چې په هېواد کې د فقر د زیاتېدو، جګړو، اقلیمي بدلونونو او د اساسي خدمتونو د بودیجې، سخت کمښت له امله د ماشومانو راتلونکی له ستر ګواښ سره مخ شوی دی.
اویواله نن پنجشنبه، لړم ۲۹مه،/ نومبر ۲۰مه، پر خپله ایکسپاڼه لیکلي چې د ماشومانو حقونه یوازې شعار نه دی، بلکې یوه «ژوندۍ ژمنه» ده چې باید د عملي ګامونو او پر وخت پانګونې له لارې خوندي شي.
د هغه په وینا، په داسې حال کې چې نړۍ د ماشوم نړیواله ورځ نمانځي، د افغانستان ماشومان لاهم د پوهنې، روغتیا او اقتصادي ستونزو تر سیوري لاندې ژوند تېروي او د هغوی لاسرسی بنسټیزو خدمتونو ته ورځ تر بلې محدودېږي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
ماشوم نړیواله ورځ هر کال د نومبر پر ۲۰مه نمانځل کېږي. دغه ورځ په ۱۹۵۴ میلادي کال کې د ملګروملتونو عمومي اسامبلې د ماشومانو د حقونو د ترویج، د هغوی د هوساینې د لوړولو او د ځوان نسل د نړیوالې همکارۍ د پیاوړتیا په هدف وړاندیز شوې وه.
یونېسف او نور نړیوال بنسټونه په دې مناسبت له حکومتونو او خلکو غواړي چې د ماشومانو د حقونو په خوندیتوب کې رغنده ګامونه واخلي او د هغوی لپاره د خوندي، سالم او هر اړخیز راتلونکي د برابرولو په برخه کې ګډه هڅه وکړي.