د ملګرو ملتونو د ماشومانو د ملاتړ صندوق یونیسف د ښځو نړیوالې ورځې په مناسبت ټینګار کړی چې افغان ښځې حقونو، عدالت او فرصتونو ته د برابر لاسرسي حق لري.
یونیسف نن یکشنبه پر اېکسپاڼه د دغو حقونو د تضمین غوښتنه کړې.
دغه بنسټ زیاته کړې چې ښځینه کارکوونکې افغانانو ته د حیاتي او ژغورونکو خدماتو په وړاندې کولو کې مهم رول لري.
یونیسف له اسلامي امارته غوښتي چې د ملګرو ملتونو دفترونو کې د ښځو پر کار لګېدلی محدودیت لغوه کړي، څو وکولی شي خپلو دندو ته دوام ورکړي.
د ملګرو ملتونو سرمنشي انتونیو ګوترش هم د ښځو نړیوالې ورځې په مناسبت ویلي، یوازې ۶۴ سلنه ښځې هغو قانوني حقونو ته چې نارینه ترې برخمن دي، لاسرسی لري.
هغه زیاته کړې چې د ښځو او نجونو د کرامت، عدالت او ازادۍ د تضمین لپاره باید له تبعیض ډک چلند او قوانینو سره مبارزه وشي.
ملګرو ملتونو ۱۹۷۵ کال کې د جنسیتي برابرۍ، له تبعیض سره د مبارزې او د ښځو له لاسته راوړنو څخه د نمانځنې په موخه د مارچ ۸مه د ښځو نړیوالې ورځې په توګه نومولې ده.