د کاپیسا مسوولان وايي چې پرون (د چنګاښ یوویشتمه، د پنجشنبې ورځ) یې د دغه ولایت د تګاب ولسوالي په میاخطل او شینکۍ سیمو کې د اوبو رسونې دوو پروژو چارې پیل کړې دي.
د سلاموطندار پښتو فېسبوکپاڼه وڅارئ
د کاپیسا د والي ویاند عبدالعزیز نظري وايي، د اوبو رسونې د دغو شبکو هره یوه یې د ۴۰ او ۵۰ متره مکعبه اوبو د زېرمه کولو وړتیا لري او په جوړېدو سره به یې د دې ولسوالي ۶۳۸ کورنیو ته د څښاک اوبه برابرې شي.
نوموړی زیاتوي چې د اوبو رسونې پر دغو شبکو څوارلس میلیونه افغانۍ لګښت راځي چې د ملګرو ملتونو د ماشومانو د ملاتړ صندوق یا یونیسف له لوري ورکول کېږي.
څو ورځې وړاندې د کاپیسا په نجراب ولسوالي کې هم د پنځه میلیونه افغانیو په لګښت د اوبو رسونې یوې شبکې د جوړېدو چارې پیل شوې وې.
اقلیمي بدلون په وروستیو کلونو کې د یوشمېر ولایتونو اوسېدونکي نه یوازې د کروندو، بلکې د څښاک اوبو له کمښت سره هم مخامخ کړي دي.