د لوګر کرنې اوبولګولو او مالدارۍ ریاست چارواکي وایي چې د کرنې او مالدارۍ وزارت او یوشمېر نړیوالو بنسټونو په همکارۍ د دوه رغنیزو پروژو چارې پيل شوې.
د دغه ولایت د کرنې، اوبولګولو او مالدارۍ ریاست رییس مولوي عبدالروف جوړې شوې یوې غونډې ته وویل، د کرنې او مالدارۍ وزارت له لوري د څرخ ولسوالي په «ډبر» سیمه کې د شاوخوا پنځه میلیونه افغانیو په ارزښت د اوبو د یوه سربند د جوړیدو چارې پیل شوې.
د سلاموطندار پښتو فېسبوکپاڼه وڅارئ
نوموړي زیاته کړه، « یاده پروژ کې د اوبو یو سربند د ۳۶ متره په اږدوالي او ۷ متره په لوړوالي، همدارنګه ۷۴ متره په اږدوالي یو کانال بیارغونه او د ۲۱۰ متره په اوږدوالي د اوبو یو استېنادي دیوال جوړیدل شامل دي.»
کرنې رئيس زیاته کړه چې د ملګرو ملتونو د خوړو او کرنې نړیوال سازمان (FAO) له لوري د محمداغې ولسوالۍ د «زرغونښار» د اوبو کاریز د شاوخوا ۳ میلیونه افغانیو په ارزښت د بیارغاونې چارې پيل شوې.
هغه زیاتوي، یادې پروژې به په راتلوونکو پنځه میاشتو کې بشپړشي او شاوخوا ۴ سوه وزګارو کسانو ته به پکې د کارکولو زمینه برابره شي.
د پل علم یوه بزګر حاجي محمد امین سلام وطندار راډيو ته وویل، خوښ ده چې په دغه ولایت کې د کرنې اړوند دوه رغنیزې پروژې پیل شوې.
نوموړي زیاته کړه چې د یادو پروژو له بشپړیدو سره به په څرخ او محمداغې ولسوالۍ کې سلګونه هکتاره ځمکه ودانه او د کرکېلې لپاره به مناسبې اوبه برابرې شي.