ترکیې د روغتیايي خدمتونو د پیاوړتیا په موخه د هرات حوزوي روغتون سره د طبي تجهیزاتو مرسته کړې.
هرات کې د ترکیې د همکارۍ اژانس «تیکا» دفتر مسوول عرفات دنیز وايي، د هرات حوزوي روغتون د وینې بانک څانګه یې په طبي تجهیزاتو سمباله کړې.
د هغه په وینا، د یادو تجهیزاتو په فعالېدو سره به د ټرافیکي پېښو، جراحۍ عملیاتو او بحراني حالت لرونکو ناروغانو لپاره د اړتیا وړ وینې برابرول پرته له ځنډ ممکن شي.
نوموړي ټینګار کړی چې د روغتیايي سکتور ملاتړ د دې دفتر له لومړیتوبونو څخه دی او هڅه کوي د ورته پروژو په پلي کولو سره، د افغانستان په بېلابېلو سیمو کې د درملنې خدمتونو کچه لوړه کړي.
هغه وویل، دغو تجهیزاتو د وینې د خوندي ساتنې، معیاري زېرمه کولو ظرفیت په پام وړ ډول لوړ کړی او د وینې اړمنو ناروغانو لپاره د اغېزمن او پر وخت کارونې زمینه برابروي.