په داسې حال کې چې د متحده ایالتونو سترې محکمې د یوه حکم په صادرولو سره د ولسمشر ډونالډ ټرمپ له خوا پر هېوادونو لګول شوې تعرفې غیرقانوني بللي، خو ټرمپ یو ځل بیا په ټولو هېوادونو د ۱۰ سلنه تعرفې لګولو ژمنه کړې.
هغه د سترې محکمې پر ضد سخت غبرګون ښودلی او ټینګار کړی، چې تعرفې به له بدیلو لارو عملي کړي.
ټرمپ د جمعې په ورځ د یوې غونډې پرمهال په سترې محکمې نیوکه وکړه او ویې ویل، دغه محکمه «د بهرنیو ګټو تر اغېز لاندې» راغلې.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
ډونالډ ټرمپ زیاته کړې چې د IEEPA پر ځای به د ۱۹۶۲ کال د سوداګرۍ پراختیا له قانونه کار واخلي، څو د ۱۵۰ ورځو لپاره پر نړیواله کچه ۱۰ سلنه تعرفه ولګوي او د هغو ځینو تعرفو ځای ونیسي چې محکمې لغوه کړې وې.
د امریکا ولسمشر د محکمې پرېکړه بېارزښته وبلله او وې ویل: «زه د تعرفو لګولو حق لرم او تل مې د تعرفو لګولو حق درلود.»
هغه وویل: «دا زموږ هېواد ته ډېره زیاته اندازه پیسې راوړي. او بیا به د شاوخوا پنځو میاشتو په موده کې اړینې بېلابېلې څېړنې ترسره کړو، څو پر نورو هېوادونو عادلانه تعرفې ولګوو.»
هغه زیاته کړه، د ناعادلانه سوداګریزو کړنو په اړه څېړنې به هم دا زمینه برابره کړي چې د تعرفو خپل کمپاین لا پراخ کړي.