زابل کې چارواکي وايي چې د ټرافیکي پېښې له امله د ښځو او ماشومانو په ګډون اووه کسان مړه شوي او درې نور ټپیان دي.
پېښه نن پنجشنبه، کب دویمه د زابل مرکز کلات ښار اړوند پولي سنګي سیمه کې رامنځته شوې.
د سلاموطندار پښتو فېسبوکپاڼه وڅارئ
د زابل ولایتي روغتون سرطبیب ډاکټر نذیراحمد حریفال وايي، مړو شویو کې څلور ښځې، یو نارینه او دوه ماشومان شامل دي.
هغه وویل: «د شاوخوا دولس بجې د کندهار لویه لار باندې د زابل مرکز کلات ته څېرمه پولي سنګي سیمه کې یو ټیلر او پاسو ډول موټر ترمنځ ټرافیکي پېښه کې ۷ تنه مړه شوي او درې تنه ټپیان شوي دي. ټپیانو کي یوه ښځه، دوه ماشومان دي، په مړه شویو کې څلور ښځې، يو نارینه او دوه ماشومان دي.»
د پېښې یوه ټپي اسدالله چې د میزاني ولسوالي اوسېدونکی دی، وایي، مړه شوي او ټپیان ټول د ده د کورنۍ غړي دي. د نوموړي په وینا، کورنۍ یې د خوشحالۍ مراسمو ته راغلې وه، خو بېرته د تللو پرمهال دا خونړۍ پېښه رامنځته شوې.
هغه وویل: «دا مړه شوي او ټپیان ټول زما د کورنۍ غړي دي. زما وړونه، زما خویندې، زما ورېندارګانې او زما د ورور لورګانې دي. دوی زموږ کور ته د خوشحالۍ مراسمو ته راغلي وو، خو د دې خوا د تللو پرمهال دا پېښه رامنځته شوې.»
د سیمې یو اوسېدونکی حاجي غلامنبي له سرپرست حکومت غوښتنه کوي چې د قربانیانو د لېږد لپاره امبولانسونه برابر شي، څو خپل مړي خپلو کورونو ته ولېږدوي. «زموږ له دولت څخه هیله ده چې امبولانسونه راته تیار کړي چي خپل شهیدان انتقال کړو، خپل کورونو ته.»
همداراز د زابل اوسېدونکی حاجي مومن له سرپرست حکومت د سړکونو د پراخولو غوښتنه کوي او وايي، اوسني سړکونه ډېر تنګ دي او د موټرچلوونکو کنټرول ته جدي اړتیا ده. «زموږ له دولت څخه غوښتنه دا ده چي داسړکونه پراخه کړي اوس خو ډېر کم بره دي او بله غوښتنه مو داده چي دا موټر چلونکي هم کنترول کړي ، اوس خو چي هر څوک موټر ورپورته شو چلوي یې.»
یاده پېښه په داسې حال کې رامنځته شوه چې څه موده وړاندې د زابل امنیه قومنداني د ټرافیکي پېښو د کنټرول خبر ورکړی و.