د افغانستان فوټسال ملي لوبډله نن چهارشنبه، سپټمبر ۱۸مه د فوټسال نړیوال جام کې د ارجنټاین فوټسال ملي لوبډلې سره سیالي کوي.
ټاکل شوې چې یاده لوبه نن شپه ۷:۳۰ بجې د اوزبیکستان د تاشکند په «هومو ارېنا» لوبغالي کې پیل شي.
دا د یاد جام په سي ګروپ کې د افغانستان دویمه لوبه ده. افغانستان خپله لومړۍ لوبه له انګولا ګټلې.
افغانستان دا مهال په سي ګروپ کې په یوې بریا او درېوو امتیازونو له ارجنټاین وروسته د جدول دویم ځای کې شتون لري.
ارجنټاین فوټسال ملي لوبډلې هم خپله لومړۍ لوبه له اوکراین څخه ګټلې. دا لومړۍ ځل دی چې افغانستان د فوټسال نړیوالې اتلې لوبډلې، ارجنټاین سره سیالي کوي.
که افغانستان دغه لوبه وګټي، د یاد نړیوال جام بل پړاو ته لاره پیدا کړي. افغان فوټسال لوبډله به خپله وروستۍ ګروپ پړاو لوبه له اوکراین سره وکړي.