د عامې روغتیا وزارت مسوولان وايي چې د یاد وزارت سرپرست په افغانستان کې د یوشمېر نړیوالو موسسو او سازمانو له استازیو سره کتلي دي.
یاد وزارت نن شنبه، سلواغې ۱۳مه، پر خپله اېکسپاڼه یوې خپره کړې خبرپاڼه کې ویلي چې د یاد وزارت سرپرست نورجلال جلالي د «Save the Children ،World Vision ،IMC او CRS» بنسټونو له استازیو سره په خپل کاري دفتر کې لیدلي دي.
د سلاموطندار پښتو فېسبوکپاڼه وڅارئ
په خبرپانه کې ویل شوي چې دې لیدنه کې د هېواد لروپرتو سیمو کې د روغتیايي خدمتونو وړاندې کولو، د مور او ماشومان روغتیايي خدمتونو ته ډېر پام، د افغان روغتیايي کارکوونکو د ظرفیت لوړونه او په اغېزمنه توګه د روغتیايي خدمتونو پليکولو په اړه بحث او خبرې شوې دي.
د خبرپاڼې له مخې، د عامې روغتیا وزارت سرپرست په دې لیدنه کې خلکو ته د غوره روغتیايي خدمتونو د وړاندې کولو په اړه ټينګار کړی او د یادو موسسو له استازیو یې، غوښتنه کړې چې د روغتیايي خدمتونو وړاندې کولو بهیر په سمه توګه پلی کړي.
په دغه لیدنه کې د یادو موسسو استازیو ډاډ ورکړی چې د عامې روغتیا وزارت سره په ګډه همغږۍ به، خلکو ته باکیفیته غوره روغتیايي خدمتونه وړاندې کړي.