د بنګلهدېش د لومړۍ وزیرې شیخ حسینې زوی، وايي چې مور یې، هند ته له تګ وړاندې، استعفا نهوه ورکړې.
شیخ حسینه د تېرې اوونې د دوشنبې پر ورځ دغه هېواد کې د دولت ضد لاریونونو او پاڅون په پایله کې هند ته لاړه او ورسره یې، ۱۵کلنه واکمني پای ته ورسېده.
د سلاموطندار پښتو فېسبوکپاڼه وڅارئ
د شیخ حسینې زوی سجیب وازد رویټرز ته ویلي: «زما مور هېڅکله په رسمي توګه استعفا نهده ورکړې او وخت یې پیدا نهکړ.»
هغه زیاته کړې چې ټاکل شوې چې شیخ حسینه په یوه بیان کې خپله استعفا وړاندې کړي، خو په وینا یې، اعتراض کوونکو د نوموړې دفتر پر لور ورغلي او اړ شوه چې له دفتره ووځي.
هغه ټينګار کړی چې د قانون له مخې، شیخ حسینه لاهم د بنګلهدېش لومړۍ وزیره ده.
سجیب وازد همداراز ویلي، که څه هم د لومړۍ وزیرې له استعفا پرته، ولسمشر له پوځي مشرانو او اپوزیسیون سره په مشوره پارلمان لغوه او لنډمهاله حکومت اعلان کړی، خو په وینا یې، دا پرېکړه محکمه کې ننګولی شي.
نوموړي وویل چې د حسینې عوامي لیګ به راتلونکو ټاکنو کې ګډون وکړي او ټاکنې باید د درېوو میاشتو په ترڅ کې ترسره شي.
هغه وويل: «زه ډاډه يم چې عوامي ليګ به واک ته ورسيږي. که نه، نو موږ به اپوزيسيون يوو.»