د کابل ښار ۱۳مه ناحیه کې د نیالګیو کېنولو یو ورځنی کمپاین نن چهارشنبه د سیمې استازو او د کابل ښاروالۍ مسوولانو له لوري پیل شو.
د دغه کمپاین په لړ کې به ۲ زره نیالګي کېنول شي چې موخه یې د سیمې زرغونولو کچې لوړول او د هوا د ککړتیا سطحې کمولو دي.
د یاد کمپاین ګډونوال له هېوادوالو غواړي چې د چاپیریال ساتنې وضعیت ښهوالي او د ښار ښکلا په برخه کې ونډه واخلي.
د کابل ښاروالۍ مسوولان د ۱۳مې ناحیې له اوسېدونکو غواړي چې د دغو نیالګیو روزنې او ساتنې ته جدي پام وکړي.
د کابل ښاروالۍ د انسجام مرستیال عبدالعلي یاسینزی وايي:
«باید له دغو نیالګیو ساتنه وشي. د نیالګي کېنول ۱۵ دقیقې وخت نیسي، خو ساتنه یې ۵۰ کاله وخت غواړي. له قومي مشرانو او استازو غواړم چې د نیالګیو حفاظت په اړه د پوهاوي لوړولو پروګرامونه جوړ کړي.»
د کابل ښاروالۍ د شمېرو پر بنسټ، ټاکل شوې روان لمریز کال کې د دغه بنسټ له لوري د کابل ښار په ۲۲ ناحیو کې شاوخوا یو میلیون نیالګي کېنول شي.