د روسیې د بهرنیو چارو وزیر سرګی لاوروف وايي چې د ولسمشر ولادیمیر پوتین هغه دستور چې د احتمالي اټومي ازموینو لپاره د وړاندیزونو د چمتوکولو په اړه ورکړل شوی، عملي کېږي.
لاوروف زیاتوي چې تراوسه مسکو ته د امریکا له لوري د ډونالډ ټرمپ د وروستي حکم په اړه هېڅ وضاحت نهدی رسېدلی؛ هغه حکم چې د امریکا پوځ ته د اټومي ازموینو د بیا پیل امکان یادوي.
ټرمپ لا څرګنده کړې نه ده چې ایا هدف یې د اټومي وړتیا لرونکو توغندیو ازموینه ده که د اټومي چاودنو پخوانۍ ازموینې بېرته فعاله کول.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
روسیې د جمعې پر ورځ له واشنګټن څخه وغوښتل چې دغه ضد او نقیض څرګندونې روښانه کړي او خبرداری یې ورکړی چې یاد کار به د روسیې او نورو هېوادونو غبرګونونه راوپاروي.
د روسیې د بهرنیو چارو وزارت ویاندې ماریا زاخارووا وایي چې د امریکا متضاد پیغامونه نړیوال اندېښنې زیاتې کړي او باید د موضوع وضاحت وشي.
پوتین د امنیت شورا ناستې ته ویلي، که د نورو هېوادونو اټومي ازموینې پیل کړې، روسیه به هم متقابل ګام پورته کړي او اړوند ادارو ته یې د معلوماتو راټولولو او ګډو وړاندیزونو جوړولو امر کړی دی.