د فلسطین د بهرنیو چارو وزارت له نړیوالو غوښتي چې پر غزې د اسراییلي ځواکونو د بریدونو بندولو او د ملکیانو ژوند خوندیتوب لپاره هرڅه ژر اقدام وکړي.
دغه وزارت یوه بیانیه کې ویلي، پر غزې د اسراییل بریدونو درولو لپاره ډیپلوماټیکې هڅې له ماتې سره مخ شوي.
بیانیه کې ویل شوي چې: «د بهرنیو چارو وزارت د اشغالګر رژیم هغو مغرورانه څرګندونو ته ژوره اندېښنه لري چې د غزې ښار پرضد د یرغل د پیل او د سلګونو زرو ملکي وګړو د ژوند د ګواښ، وژنې او بېځایه کېدو په اړه یې کړي.»
د فلسطین بهرنیو چارو وزارت د هغو سیاسي حللارو د پیاوړتیا ملاتړ کړی چې د جګړې د سمدستي بندېدو، د غزې د اوسېدونکو د بېځایه کېدو د مخنیوي، د برمته شوو کسانو د خوشې کېدو او غزې ته د بشري مرستو د رسېدو تضمین وکړي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
دا غوښتنه داسې مهال مطرح کېږي چې اسراییلو پر غزې ښار ځمکني بریدونه پیل کړي او د غزې ښار له اوسېدونکو یې غوښتي چې سیمې پرېږدي.
د راپورونو پر اساس، دغه پوځي عملیات د امریکا بهرنیو چارو وزیر مارکو روبیو او د اسراییل لومړي وزیر بنیامین نتنیاهو له لیدنې وروسته پیل شوي.
د اسراییل لومړي وزیر ویلي چې دغه عملیات د حماس له منځه وړلو لپاره ترسره کیږي.
نږدې دوه کلونه کېږي چې د اسراییلو او حماس ترمنځ نښته روانه ده او په دې موده کې د دایمي اوربند لپاره د نړیوالو هڅو پایله نه ده ورکړې.