د بهرنیو چارو وزیر امیرخان متقي وايي چې په دې وروستیو کې د افغانستان او تاجیکستان ترمنځ سیاسي، اقتصادي او امنیتي همکارۍ پر لور د باور فضا رامنځته شوې، خو په وینا یې، ځینې کړۍ هڅه کوي، دغه مثبته فضا زیانمنه کړي.
نوموړي دغه څرګندونې د تاجیکستان د بهرنیو چارو وزیر سراجالدین مهرالدین سره د ټیلیفوني اړیکې پرمهال کړې دي.
د بهرنیو چارو وزارت نن سهشنبه، لیندۍ یوولسمه په یوې خبرپاڼه کې ویلي چې دواړو لوریو په دې ټیلیفوني خبرو کې د سیاسي اړیکو، اقتصادي همکارۍ، سرحدي وضعیت، امنیتي همغږۍ او سیمهییزو ابتکاراتو په اړه هم خبرې کړې دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د خبرپاڼې له مخې، متقي د تاجیکستان خاوره کې وروستۍ رامنځته شوې امنیتي پېښې او د چینايي وګړو مرګژوبله د غندنې او خواشینۍ وړ بللې او د سیمهییز ثبات لپاره یې د ګډو همکاریو پر اهمیت ټینګار کړی دی.
بلخوا د تاجیکستان د بهرنیو چارو وزیر سراجالدین مهرالدین بیا د سرحدي همغږۍ د پیاوړتیا ترڅنګ، ویلي چې هېواد یې، له افغان حکومت سره د مثبت تعامل پلوي دی.
خبرپاڼه کې همداراز ویل شوي چې دواړو لوریو د سرحدي ځواکونو د منظمو تماسونو، د امنیتي همکاریو، د ګډو کمېټو او د تخنیکي ناستو پر دوام هوکړه وکړه، څو سیمه د زیات خپلمنځي باور او ثبات شاهده وي.