د لوګر کرېکټ امریت مسوولان وایي چې د دغه ولایت په محمداغې ولسوالي کې د ولایت په کچه د لس غوره لوبډلو ترمنځ د کرېکټ شل اوریزې سیالي د «سفېدسنګ» کرېکټ لوبډلې په بریا سره پای ته ورسېدې.
د دغه ولایت د کرېکټ امر حشمتالله ستانکزي سلاموطندار ته وویل، د کرېکټ دغه شل اوریزې رسمي سیالي دوه اوونۍ وړاندې د یاد امریت له لوري د «پسرلي جام» په نوم پیل شوې وي چې نن پای ته ورسېدې.
هغه زیاته کړه، د یادو سیالیو پایلوبې ته د سفیدسنګ او فلاح کرېکټ لوبډلو لاره موندلې وه چې سفېدسنګ کرېکټ لوبډلې وکولای شول، خپلې سیالې لوبډلې ته د ۵ منډو په توپېر ماته ورکړي او د پسرلي جام اتلولي په خپل نوم کړي.
نوموړي وویل چې له یادو سیالیو جوړیدو څخه موخه د لوګر په کچه کرېکټ ورزش ته وده ورکول، د ورزشکارانو ترمنځ د تجربو شریکول او همغږۍ رامنځته کول وو.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
ده وویل، هڅه کوي چې ورته سیالي د لوګر په مرکز پل علم او ولسوالیو کې هم جوړې کړې دي.
بلخوا د یادو سیالیو یوه لوبغاړي سیدمحمد سلاموطندار ته وویل، دا ډول سیالي کولای شي چې د ورزشکارانو ترمنځ ښې اړیکې رامنځته کړي او د ورزشکارانو ظرفیت کچه لوړه کړي.
نوموړي د لوګر په کرېکټ امریت غږ وکړ چې لوګر کې د کرېکټ ورزشکارانو ته د ظرفیت لوړونې ترڅنګ، د معیاري لوبغاړي او وسایلو برابرولو برخه کې خپلې هڅې ونهسپموي.