د اسراییلو د پوځ ویاند اویخای ادرعي وايي چې د لبنان سوېل په برعشیت سیمه کې د یوې هوايي حملې پرمهال د حزبالله یو غړی وژل شوی دی.
د هغه په وینا، وژل شوی کس د حزبالله د پوځي تاسیساتو د بیارغونې په هڅو کې لاس درلود. ادرعي همدارنګه ویلي چې د شبعا په سیمه کې په یوه بل برید کې د «سرایا لبناني» دوه غړي هم وژل شوي دي.
دا هغه ډله ده چې د حزبالله تر قومندې لاندې فعالیت کوي. نوموړي ادعا کړې چې دغه کسان د جګړهيي تجهیزاتو د لېږد او قاچاق برخه کې ښکیل وو.
لبناني سرچینو تایید کړې چې د جمعې پر ورځ د بنتجبیل ښار ترڅنګ د صلاح غندور روغتون ته نږدې پر یوه موټر د بېپیلوټه الوتکې برید شوی چې په پایله کې یې اووه ملکي کسان ټپیان شوي دي.
د لبنان ملي خبري ادارې ویلي چې د شنبې سهار هم د اسراییلو ډرون درې بمونه د عیترون او بلیدا ترمنځ یوې کیندنې ته غورځولي دي.
په وروستیو ورځو کې د اسراییلو هوايي بریدونه زیات شوي او ادعا کوي چې هدف یې د حزبالله غړي او تاسیسات دي.
د لبنان حکومت بیا ټینګار کوي چې د سرحدي او امنیتي ستونزو د حل لپاره خبرو ته تیار دي، خو وايي، اسراییل د مثبت ځواب پر ځای حملې پراخې کړي دي.
حزبالله بیا هر ډول مذاکره رد کړې او له لبناني چارواکو یې غوښتي چې د اسراییلو بریدونو پر وړاندې اقدام وکړي.