له هغه وخت راهیسې چې د اسراییلو او لبنان کې د ایران له ملاتړ برخمنې حزبالله ډلې ترمنځ نښتې پیل شوي، تر دې مهاله دغه هېواد کې ۳۰۰۰ کسان وژل شوي دي.
د لبنان روغتیا وزارت چارواکي وايي چې یاد کسان یوازې د ۱۳ میاشتو پرمهال وژل شوي دي.
د سلاموطندار پښتو فېسبوکپاڼه وڅارئ
د دې هېواد د عامې روغتیا وزارت د چارواکو په وینا، پر لبنان د اسراییلو د برید له پیل راهیسې ۳۰۰۲ کسانو خپل ژوند له لاسه ورکړی او ۱۳۴۲۹ کسان هم ټپیان شوي دي.
په وژل شویو کې ۵۸۹ مېرمنې او ۱۸۵ ماشومان هم شامل دي.
که څه هم اسراییل ادعا کوي چې په دې بریدونو کې د حزبالله ډلې غړي وژل شوي، خو راپورونه او شواهد ښيي چې یادو بریدونو کې تر ډېره ملکیان په نښه شوي دي.
تېره اوونۍ د ماشومانو لپاره د ملګرملتونو ملاتړې ادارې «یونېسف» ویلي و چې لبنان کې د بریدونو پرمهال هره ورځ یو ماشوم خپل ژوند له لاسه ورکوي.
د یونېسف په وینا، زرګونه نور ماشومان بیا د روانې جګړې له امله له وېرې او خپګان سره مخ دي او رواني وضعیت یې، ناسم بلل شوی دی.
د دې ترڅنګ د لبنان ۱.۲ میلیونه وګړي د اسراییلو د روانو بریدونو له امله په زور خپلو سیمو پرېښودو ته اړ شوي دي.