د کډوالۍ نړیواله سازمان «ایاواېم» مسوولان وايي چې د تېرو درېوو میاشتو پرمهال څه باندې نیم میلیونه افغانان له هېواده وتلي دي.
یاد سازمان په خپل یوه تازه راپور کې ویلي چې د روان میلادي کال د اپرېل او جون میاشتو ترمنځ نږدې ۵۵۰زره کسان له افغانستان څخه نورو هېوادونو ته کډه شوي دي.
د سلاموطندار پښتو فېسبوکپاڼه وڅارئ
د راپور پربنسټ، له هېواده د یاد شمېر افغانانو د وتلو اصلي لامل ناوړه اقتصادي وضعیت ښودل شوی دی. په راپور کې ویل شوي چې دغه شمېر د روان کال لومړیو درېوو میاشتو په پرتله ۱۹سلنه زیاتوالی ښيي.
د یاد سازمان په راپور کې دا هم راغلي چې د روان کال دویمه ربع کې له افغانستان څخه ایران ته د تلونکو افغانانو په شمېر کې ۲۶سلنه او پاکستان ته د تلونکو کسانو شمېر، ۱۴سلنه زیات شوی دی.
بلخوا بیا له دوو ګاونډیو هېوادونو، ایران او پاکستان څخه څه باندې ۸۵۰زره افغانان بېرته هېواد ته راستانه شوي دي.
د ای او اېم د شمیرو له مخې، ایران ته د تلونکو کسانو له ډلې ۹۰سلنه او پاکستان ته د تلونکو کسانو له ډلې ۶۰سلنه نارینه دي.