د کلیوبیارغونې او پراختیا وزارت مسوولانو نن یکشنبه، سلواغې ۱۲مه، د هېواد په کلیوالي سیمو کې د پراختیايي پروژو د ښه پليکېدو په موخه، په کابل کې له نړیوالو بنسټونو او کورنیو موسسو سره د همغږۍ ناسته وکړه.
د کلیوبیارغونې او پراختیا وزیر عبداللطیف منصور، له نړیوالو بنسټونو او کورنیو موسسو غوښتنه وکړه چې د افغانستان د کلیو وضعیت د ښهوالي لپاره پراختیايي پروژې د دې وزارت په همغږۍ عملي کړي.
نوموړي وویل: «موږ په هره سیمه کې محلي شوراګانې لرو او د خلکو اړتیاوې موږ ته ښه معلومې دي. دا اړتیاوې به له تاسو سره شریکوو او د همدې مسوولیت له مخې مو کورنیو او بهرنیو مؤسسو ته بلنه ورکړې، څو وکولای شو په لرې پرتو سیمو کې د دې وزارت په همغږۍ او د زموږ د تخنیکي ټیمونو تر څارنې لاندې پرمختیایي پروژې عملي کړو.»
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
په ورته مهال نړیوال بنسټونه او موسسې له اسلامي امارت غواړي چې په افغانستان کې د پراختیايي پروژو د تطبیق لپاره لازمې اسانتیاوې برابرې کړي.
د دغو بنسټونو مسوولان وایي، د مرستو بهیر او د هوکړهلیکونو د لاسلیک اوږدېدل د دوی له اساسي ننګونو څخه دي او ټینګار کوي چې د پراختیايي پروژو د پليکېدو لپاره دې اسانتیاوې رامنځته شي.
د نړیوال خوراکي پروګرام استازی عبدالرحمان ناصري وویل: «موږ هیله لرو چې لا ډېره همغږي رامنځته شي او مرستې مستحقو کسانو ته ورسېږي. همداراز باید تفاهملیکونه په ټاکلي وخت کې عملي شي. په ځینو سیمو کې د مرستو د رسولو پر مهال لاسوهنه کېږي، خو زموږ په معیارونو کې باید مداخله ونه شي، ځکه موږ د همدې معیارونو د پلي کولو لپاره له نړیوالې ټولنې څخه مالي مرسته ترلاسه کړې ده.»
دCHI موسسې رییس تاجمحمد بصیر چې په دې ناسته کې یې ګډون کړی و، وویل: «هر څومره چې د ولایت په کچه همغږي زیاته شي، هماغومره به د پروژو په پلي کېدو کې اسانتیا رامنځته شي او د مؤسسو او بنسټونو ستونزې به راکمې شي.»
سره له دې، د کلیو بیارغونې او پراختیا وزارت مسوولان وایي، یادې ستونزې به وڅېړي او د اسلامي امارت له رهبرۍ سره به یې شریکې کړي.
همدارنګه، د ملګروملتونو د پروژو د خدمتونو دفتر (UNOPS)مسوولان وایي چې دغه اداره دامهال د افغانستان په شاوخوا ۱۰زره کلیو کې د زیربناوو د پراختیا، روغتیایي خدمتونو، انرژۍ، کارموندنې، د اوبو او چاپېریال د مدیریت د ښهوالي او بېړنیو مرستو په برخو کې پروژې تر کار لاندې لري.