د شمالي کوریا دولتي رسنۍ وايي چې د روانې اوونۍ پرمهال دغه هېواد کې ۱.۴ میلیونه ځوانانو له پوځ سره د یوځای کېدو او بېرته ورګرځېدو سره نوملیکنه کړې.
رویترز خبري اژانس نن چهارشنبه، اکتوبر ۱۶مه راپور ورکړی چې پوځ سره د یوځای کېدو لپاره زدهکوونکو او نورو ځوانانو نوملیکنه کړې او خوښي یې، څرګنده کړې چې د «دښمن لهمنځه وړو لپاره د انقلاب وسلو سره په مقدسه جګړه» کې وجنګېږي.
د سلاموطندار پښتو فېسبوکپاڼه وڅارئ
د شمالي کوریا دولتي رسنۍ ویلي: «که جګړه پیل شي، د کوریا جمهوریت «ROK» به له نقشې پاک کړو. لکه څنګه چې دوی جګړه غواړي، موږ چمتو چې د دوی شتون پای ته ورسوو.»
شماليکوریا پر سوېليکوریا تور لګولی چې جګړې ته لمن وهي. دغه څرګندونې وروسته له هغې وشوې چې شماليکوریا ادعا وکړه، سوېليکوریا د څار لپاره د دوی هوايي حریم ته ډرون الوتکه ورلېږلې وه.
د رویټرز په راپور کې همداراز ویل شوي چې شمالي کوریا له دې وړاندې هم د ترېنګلتیا پرمهال له پوځ سره د یوځای کېدو لپاره د ځوانانو د نوملیکنې لوړ شمېر ادعا کړې.
د راپور پر بنسټ، تېرکال هم د یاد هېواد دولتي رسنۍ ویلي و چې شاوخوا ۸۰۰زره کسانو په خپله خوښه د امریکا پر وړاندې د جګړې لپاره د شمالي کوریا له پوځ سره د یوځای کېدو غوښتنه کړې وه.
له دې وړاندې د ۲۰۱۷ کال پرمهال هم دې هېواد ادعا کړې وه چې ۳.۴ میلیونه کسان چې د واکمن ګوند غړي، کارګر او سرتېري پهکې شامل دي، په رضاکارانه توګه خدمت کوي.