د لوګر امنیه قومنداني چارواکي وایي چې تېره ورځ «یکشنبه، چنګاښ ۲۴مه» په محمداغې ولسوالي کې په دوه جلاجلا امنیتي پېښو کې د یوه قومي مشر په ګډون دوه کسان وژل شوي دي.
د دغه ولایت امنیه قومنداني ویاند احمدالله انس سلاموطندار ته وویل، د محمداغې ولسوالي په «کیشم» سیمه کې د کورنۍ ستونزو له امله یوه پلار خپل ۱۸ کلن زوی د چاقو په ګزارونو وژلی دی.
د سلاموطندار پښتو فېسبوکپاڼه وڅارئ
د نوموړي په خبره د پېښې قاتل نیول شوی او په دې اړه د امنیتي ځواکونو څېړنې روانې دي.
انس زیاتوي، د همدې ولسوالي په «دهنو» کلي کې تېره ورځ غرمه شاوخوا ۱۲ بجې ناپېژنده کسانو د عبدالحبیب په نوم یو قومي مشر په ډزو وژلی دی.
هغه زیاته کړه، یاده پېښه د امنیتي ځواکونو تر کلکې څېړنې لاندې ده او ژر به د نوموړې پېښې عاملان ونیسي او قانون ته به یې وسپاري.
د محمداغې ولسوالۍ اوسېدونکي هم له امنیتي بنسټونو غواړي چې د ورته امنتي پېښو مخنیوی وکړي او رامنځته شوې امنتي پېښو ژوره پلټنه وکړي او د پېښې عامیلین مجازات کړي.