هلمند کې چارواکي وايي چې د دغه ولایت مرکز لشکرګاه کې د ۱۱ کیلومټره مربع سړک د پراخولو او پخولو چارې پیل شوې.
د یاد سړک د پخولو چارې نن پنجشنبه، چنګاښ ۲۱مه د یو لړ مراسمو په ترڅ کې پیل شوې چې ۱۹ میلیونه افغانۍ لګښت به پرې راشي.
د سلاموطندار پښتو فېسبوکپاڼه وڅارئ
یادو مراسمو کې د خبرو پرمهال د لښکرګاه ښاروال عبدالله روحاني د قراردادي شرکت مسوولانو ته سپارښتنه وکړه چي یاده پروژه پر ټاکلي وخت او معیاري ډول بشپړه کړي.
نوموړي وویل: «موږ ژمن یو چي ولسونو ته ښاري خدماتو ترڅنګ د ښار ښکلا لپاره کار وکړو، څو د خلکو اقتصاد قوي شي او موږ ډاډ ورکوو چي هر اړخیز خدمات وړاندې کړو، څو د ښار ښکلا مو لا زیاته شي او خلک هوسا شي.»
د لښکرګاه ښاروالۍ مطبوعاتي مسوول محمدطاهر ابشار بیا دې مراسمو ته وویل چې یاد سړک د ښاروالۍ پراختیايي بودیجې څخه د ۱۹میلیونه افغانیو په لګښت جوړېږي چي چارې به یې د درېو میاشتو په ترڅ کې بشپړې شي.
هغه وویل: «د دغه سړک د پراخولو او قیررېزۍ چاري نوي عمري او ساختماني شرکت ته په قرارداد ورکول شوي چې په عصري او معیاري ډول به جوړ کړل شي.»
لښکرګاه ښاریانو د دغه پروژې پلي کېدو له امله خوښ دي او له اړوند چارواکو د ورته نورو پراختیايي پروژو د پليکېدو غوښتنه کوي.
د لښکرګاه ښاروالۍ له دې وړاندې هم د ښار ښلاک ترڅنګ ګڼې نورې پراختیايي او رغنیزې پروژې هم پلې کړي چې لسګونه کسانو ته د کار کولو زمینه هم پهکې برابره شوې.