غزه کې د حماس ډله وايي چې د یاد ښار په سوېل کې یې، د اسراییلو پر پوځي مرکز برید کړی دی.
نړیوالو رسنیو راپور ورکړی چې حماس بېګاه شپه د غزې سوېل د «موراګ دهلیز» په نوم د اسراییلو د قومندانې او کنټرول مرکز باندې راکېټي بریدونه کړي دي.
بلخوا د اسراییلو پوځ ویلي چې له سوېل خانیونس ښار څخه توغول شوی توغندی، په رفح ښار کې د بشردوستانه مرستو وېش مرکز ته په ۲۵۰ مټرۍ کې لګېدلی دی.
د اسراییلو پوځ زیاته کړې چې له برید سره سره، د مرستو وېش دغه مرکز د نن ورځې لپاره هم پرانېستی چې اوونۍ کې لسګونه زره کسانو ته مرستې ورکوي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
اسراییلو له دې وړاندې ادعا کړې چې غزه کې فلسطینۍ ډلې د مرستو وېش بهیر ټکنی کوي، خو حماس په ګډون ټولو ډلو دغه ادعاوې رد کړي دي.
غزه کې د اسراییلو او امریکا له لوري د بشردوستانه مرستو وېش مرکز او څـانګونو کې د مرستو وېش بهیر له نیوکولو سره مخ دی او ملګروملتونو هغه د «مرګ لومه» بللې ده.