د لبنان روغتیا وزارت مسوولان وايي چې دغه هېواد کې د مخابراتي وسایلو په چاودنو کې لږ تر لږه ۲۰ کسان وژل شوي او ۴۵۰ نور ټپیان دي.
د راپورونو له مخې، پرون چهارشنبه، سپټمبر ۱۸مې راهیسې لبنان کې تر ډېره د حزبالله د غړیو په مخابراتي وسیلو کې چاودنې شوې دي.
تېره ورځ چاودنې په پېجرونو کې شوې وې او د یوې ماشومې په ګډون ۱۲ کسان وژل شوي او زرګونه نور بیا ټپیان شوي وو.
بیروت کې د ایران سفیر هم دې چاودنو کې ټپي شوی دی.
ملګروملتونو کې د ایران سفیر امیرسعید ایرواني دغه سازمان ته په یوه لیک کې لیکلي چې بیروت کې د خپل سفیر د ټپيکېدو پلټنه کوي.
نوموړي زیاته کړې چې هېواد یې، په یادو بریدونو کې اسراییل ګرم بولي. د لبنان حزبالله غورځنګ هم د دغو خونړیو چاودنو مسوول اسراییل بللی دی.
خو په خپله اسراییل تراوسه لبنان کې پر دغو چاودنو تبصره نهده کړې، نه یې د هغو مسوولیت منلی او نه یې هم رد کړی دی.
د اسرائیلو دفاع وزیر یواو ګالانت یوازې دومره ویلي چې هېواد یې د جګړې نوي پړاو ته ننوتی دی.