د هلمند مرکز لښکرګاه ښار اړوند سیمه کې د کندهار-هرات پر لویه لاره د څه باندې ۲۷ کیلومټره سړک او پر هلمند سیند د ۳۵۰ پل د جوړېدو چارې پیل شوې.
یاد سړک ټولټال ۲۷.۵ کیلومټره اوږدوالی او ۱۲ مټره پلنوالی لري. ترڅنګ یې د لښکرګاه ښار د پنځمې ناحیې اړوند سیمه کې پر هلمند سیند د ٣٥٠متره په اوږدوالي د یوه پل د جوړېدو چارې هم پیل شوې.
د سلاموطندار پښتو فېسبوکپاڼه وڅارئ
د اطلاعاتو او فرهنګ وزارت او هلمند محلي چارواکو په باور د دې پُل او سړک پر جوړېدو سره به د هلمند سیند پر پخواني تړل شوي پُل ټرافیکي ګڼهګوڼه راکم او د کرنې، صعنت او سوداګرۍ برخو کې به په لویه کچه اسانتیاوې رامنځته شي.
د اطلاعاتو او فرهنګ وزارت سرپرست خیرالله خیرخواه وویل: «دا پُل ۳۵۰ متره اوږدوالی لري چې د هلمند پرسیند جوړېږي او دغه ۲۷،۵ کیلومتره سړک چي لښکرګاه ښار د باباجي ولسوالي له لارې، هرات- کندهار له عمومي شهرا سره وصلوي، د پخوا په پرتله پنځوس کیلومتره لنډوالی راځي او همدارنګ، بله ګټه د سړک او پُل دا ده په ښوراب پوځي اډه کې چې کوم ملکي هوايې ډکر دی، هغه په اسانۍ لار پرانیستل کېږي.»
د هلمند والي ویاند محمدقاسم ریاض وویل: «لښکرګاه ښار شته هوايي ډګر د لویو پروازونو لپاره ډېر مناسب نهدی، خو ښوراب پوځي اډه کې شته هوايي ډګر د لویو الوتکو د پروازونو لپاه اسانتیاوي چې دا پُل او سړک په اسانۍ سره لار ورته پرانیزي او ښوراب کې شته هوايي ډګر د کارګو الوتکو لپاره هم ډېر ښه ځای دی.»
د هلمند اوسېدونکي د دغه سړک او پُل رغنیزو چارو پیل ته خوښ دي او وایي، د دې سړک او پُل پر جوړېدو سره به د ورځني ژوند ګڼو اسانتیاوو ته لاسرسی پیدا کړي او تر څنګ به یې، کروندګر وکولای شي، د هلمند له بېلابېلو ولسوالیو او سیمو خپل کرنیز محصولات پر وخت او لږ لګښت تر لښکرګاه ښار ورسوي .
د هلمند اوسېدونکي عبدالغني سلاموطندار ته وویل: «موږ ډېر خوښ یوو چې موږ ته دلته دا سړک جوړېږي او دا پُل راته جوړېږي. دا به موږ او نورو خلکو ته ډېرې اسانتیاوې رامنځته کړي.»
که څه هم د دغه سړک او پُل کره مالي لګښت نهدی، رسنیز شوی، خو د اطلاعاتو او فرهنګ وزارت، ولایتي ادارې د معلوماتو له مخې، د سرپرست حکومت له بودیجې لګښت ورکول کېږي او دوو کلونو کې به یې چارې بشپړې شي.