د امریکا ولسمشر ډونالد ټرمپ وینزویلا کې پر ځینو اهدافو د برید امر صادر کړی.
د سيبياېس شبکې نن (شنبه، جدي ۱۳) راپور ورکړی چې د امریکا ولسمشر ډونالد ټرمپ وینزویلا کې د پوځي تاسیساتو په ګډون پر ځینو اهدافو د برید امر کړی.
د وینزویلا حکومت هم د امریکا د بریدونو په غبرګون کې اعلان کړی چې واشنګټن به «د دې هېواد د طبیعي سرچینو په نیولو بریالی نه شي.»
کاراکاس ویلي چې د امریکا د برید هدف «د وینزویلا د تېلو او معدني سرچینو تصاحب» دی.
د وینزویلا حکومت ویلي چې د دغه هېواد ولسمشر نیکولاس مادورو د «ملي بېړني حالت» اعلان کړی. د راپورونو پر اساس، نن شنبه سهار مهال د وینزویلا پلازمېنه کاراکاس کې لږ تر لږه ۷ چاودنې شوي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
دغه چاودنې داسې مهال شوي چې د امریکا متحده ایالاتو او وینزویلا ترمنځ تاوتریخوالی لوړې کچې ته رسېدلی دی.
امریکا همدارنګه دې وروستیو اونیو کې د وینزویلا په سواحلو کې دوه نفتوړونکي کیښتۍ نیولي او د ۳۰ کیښتیو پر وړاندې چې حکومت یې وایي مخدره توکي یې لېږدول، مرګوني بریدونه ترسره کړي دي.
د امریکا ولسمشر ډونالد ټرمپ د جدې په اتمه وویل، د وینزویلا پر یوه بندر یې برید کړی، هغه بندر چې ویل کېږي هلته د نشهیي توکو د لېږد لپاره کښتۍ بارېدې.
دا د امریکا له لوري پر وینزویلا لومړنی اعلان شوی برید بلل کېږي چې موخه یې د ولسمشر نیکولاس مادورو پر حکومت فشار راوستل او له واکه لرې کول دي.
ټرمپ تر دې وړاندې ویلي وو چې ده د امریکا مرکزي استخباراتي اداره (سياېاې) ته په وینزویلا کې د پټو عملیاتو د ترسره کولو اجازه ورکړې ده.