کندهار کې د باروړونکو موټرو لپاره د نوي ترمنل د جوړېدو چارې پېل شوې. یاد ترمینل به د کندهار ختځ کې پر ۵۸۲ جریبه ځمکه د درېوو کلونو په موده کې د ۵۰۲ میلیونه افغانيو په ارزښت د ترانسپورت او هوایي چلند وزارت له لوري جوړېږي.
مسوولان وایي، د دې ترمینل جوړېدو سره به کندهار کې ترافيکي ګڼهګوڼه کمه شي.
د کرنې، اوبولګولو او مالدارۍ وزارت په پراختیایي بودیجه، د کندهار کرنې اوبولګولو او مالدارۍ ریاست په مشري او د طبیعي سرچنیو امریت په تخنیکي همکاري، د کندهار درېوو ولسوالیو کې د یوه چکډېم جوړولو او دوو نورو چکډېمونو د پاتې کارونو د بشپړولو چارې د ۴.۵ میلیونه افغانیو په لګښت پیل شوې.
د ملګروملتونو د خوړو نړیوال پروګرام خبر ورکړی چې په افغانستان کې لوږه ورځ تر بلې د زیاتېدو په حال ده، خو د بودیجې کموالي له امله دغه سازمان یوازې د اړتیا لرونکو یو محدود شمېر خلکو سره مرسته کولای شي.
دغه سازمان د دوشنبې په ماښام، د تلې ۲۸مه، په یوې خبرپاڼه کې لیکلي: «کافي او مغذي خواړه د هر ماشوم حق دی.»
د کابل ښار ګڼشمېر اوسېدونکي د برښنا له دوامداره او پرلهپسې پرچاويو شکایت کوي. دوی وایي، د وروستیو ورځو پرمهال، د ورځې برښنا نهلري او د شپې لهخوا هم یوازې د څو ساعتونو لپاره برښنا ته لاسرسی لري.
د دوی په وینا، د برښنا دوامداره نشتوالی د خلکو په ورځني ژوند، زدهکړو او کاروبارونو ناوړه اغېز کړی دی.
د پکتیا د مرکز په ګډون په بېلابېلو ولسواليو کې ۱۵۰زره جریبه ځمکه د ځمکو غصب مخنیوي کمېسیون تر بیاکتنې لاندې ده او خلکو ته پهکې د هېڅ ډول کارکولو اجازه نه ورکول کېږي.
د پکتیا یوشمېر اوسېدونکي وايي، د غصب کمېسیون تر بیاکتنې لاندې ځمکو تصفیه ډېر وخت نیسي چې له همدې امله يې خلک له ستونزو سره مخ کړي او په ډېرو سیمو کې د ودانیزو چارو کارونه هم نیمګړي پاتې دي.
د پکتیکا د ټولګټو چارو ریاست مسوولان وایي چې نن (دوشنبه) د مرکز ښرنې ښار څخه د زرغونښار ولسوالۍ پر لور د ۴۸ کیلومتره اوږد سړک د بیارغونې چارې په رسمي ډول پیل شوې چې ټول لګښت یې ۱۰۶ میلیونه افغانۍ اټکل شوی دی.
د میدانوردګ والي ملاخیراالله خیرخواه د دغه ولایت مقام کې د ناروې اړوند «NEA» ادارې له مشرې انې کترین سره لیدلي او د یادې لېدنې په ترڅ کې د یادې ادارې مشرې ژمنه کړې چې په دغه ولایت کې به یوشمېر پراختیايي پروژې پيل کړي.
د لوګر مرکز پلعلم کې د صنعت او سوداګرۍ ریاست له لوري د کورنیو تولیداتو پېژندنې، ملاتړ او بازارموندنې په موخه درې ورځنی نندارتون جوړ شوی دی.
د یاد نندارتون پرانېستو مراسمو کې د صنعت او سوداګرۍ وزارت، د لوګر سیمهییزو چارواکو او سوداګرو ګډون کړی وو.
د هرات یوشمېر اوسېدونکي په دغه ولایت کې د نادرو او وحشي ژوو له ورکېدو اندېښنه څرګندوي او وايي، په تېر کې به د دې ولایت په ډېری ولسوالیو کې د ژویو بېلابېل ډولونه لیدل کیدل، خو اوس یې، څرک نهلیدل کېږي.
دوی یې لاملونه بېځایه ښکار، اقلیمي بدلونونه او پرلهپسې وچکالي یادوي چې په پایله کې یې د حیواناتو مختلف ډولونه لهمنځه تللي یا هم لرې پرتو سیمو ته کډه شوي دي.
له تېرې جمعې راهیسې د افغانستان او پاکستان ترمنځ له پوځي نښتو سره هممهاله پر ډیورنډ کرښه د تورخم، سپینبولدک، ډنډپټان، غلام خان او انګور اډې لارې لاهم د سوداګریزو توکو د لېږد-رالېږد پرمخ تړل شوې دي.
یوشمېر افغان سوداګر چې تېرو نهو ورځو راهیسې یې په توکو بار موټر دواړو خواوو ته بند پاتې، وايي چې د افغانستان د تجارتي موټرو په درولکېدو سره د تازه مېوو او سبزیو لویه برخه خرابه شوې او سلګونه میلیونه ډالر زیان ورته رسېدلی دی.
د لوګر مخابراتو او معلوماتي ټکنالوژۍ ریاست مسوولان وایي چې د دغه ولایت مرکز پلعلم په بابوس او برهکي برک ولسوالي په پنده سیمه کې دوه مخابراتي سايټونه پرانېستل شول.
د پکتيکا په مرکز ښرنه کې د کرېکټ يوشمېر لوبغاړي وايي چې د پاکستان د پوځي رژيم له لوري په ارګون ولسوالي کې د کرېکټ په لوبغاړو شوي بريد په تړاو دې نړيوالې ادارې بېپرې څېړنې وکړي.
دوی يادې څرګندونې په مرکز ښرنه کې د شهيد شو لوبغاړو روح ته د دعا په مراسمو کې وکړې.
د اسلامي امارت د ځواکونو او د پاکستان د پوځ ترمنځ د نښتو له زیاتېدو وروسته، د پاکستان لومړي وزیر د دې هېواد له لوړپوړو چارواکو سره په یوه غونډه کې ټولو ایالتونو ته امر کړی چې بېاسناده افغان کډوال په چټک او منظم ډول له هېواده وباسي.
اوس مهال زرګونه افغان کورنۍ چې له کلونو راهیسې د پاکستان په بېلابېلو کمپونو کې مېشتې دي، د شړلو له جدي ګواښ سره مخ دي.
د پکتیکا د پوهنې ریاست د ښوونیزو خدمتونو د پیاوړتیا په موخه اعلان کړی چې د ولایت په مرکز او شپږو ولسوالیو کې به ۲۱ ښوونځیو ته د ۲۶ میلیونو افغانیو په لګښت د لمریزې (سولر) برښنا سېسټونه ولګول شي.
د پکتیکا د پوهنې ریاست له لوري په خپره شوې خبرپاڼه کې ویل شوي، دغه سېسټمونه د پوهنې له یوه همکار بنسټ سره په مالي او تخنیکي همکارۍ فعالېږي.
د اسلامي امارت ویاند، ذبیحالله مجاهد نن یکشنبه (د تلې۲۷مه) په یوې خبرپاڼه کې ویلي چې د اسلامي امارت او پاکستان د استازیو ترمنځ خبرې د دوه اړخیز تړون په لاسلیکېدو سره پای ته رسېدلې دي.
په خبرپاڼه کې ویل شوي، دواړو هېوادونو د بشپړ اوربند، متقابل درناوي او د ښه ګاونډیتوب پر اصولو ټینګار کړی دی.
يوې باوري سرچینې سلاموطندار ته تایید کړې چې د سالنګ لويه لاره به تر بلې خبرتيا پورې ونهتړل شي او ښاريان کولای شي له دې لارې په ډاډه زړه تګراتګ وکړي.
سرچینې «سلاموطندار» سره په خبرو کې وويل، د ټولګټو وزارت هغه پخوانۍ پرېکړه چې د تلې ۲۶مه څخه د لړم تر شپږمې پورې د ترميماتو په موخه د سالنګ د لارې د تړلو په اړه نيول شوې وه، د ځينو تخنيکي او اداري دلايلو له امله ځنډول شوې ده.
