د ا.ا یوشمېر چارواکو د روان لمریز کال له پیل راهیسې له افغانستان سره په اقتصادي، سوداګریزو او ټرانزیټي برخو کې د هېوادونو د همکاریو را جلبولو په موخه بېلابېلو هېوادونو ته لږترلږه لس سفرونه کړي او هلته یې په ځینو مهمو غونډو کې هم ګډون کړی دی. په دوحه کې د افغانستان لپاره د ملګرو ملتونو ناسته یې وروستۍ او مهمه غونډه وه چې د ا.ا د ویاند ذ.بېحالله م.جاهد په مشري یوه پلاوي پهکې ګډون کړی و.
مالیې وزارت د یکشنبې په ورځ د یوې خبرپاڼې په خپرولو سره اعلان وکړ چې د کورنیو تولیداتو د ملاتړ په موخه یې افغانستان ته پر یوولسو واردېدونکو توکو ګمرکي تعرفه لوړه کړې ده. په همدې حال کې یوشمېر صنعتکارانو سلاموطندار ته ویلي چې پر ځینو وارداتي توکو د ګمرکي تعرفې په لوړولو سره به د کورنیو تولیداتو د پلور لپاره لاره هواره شي.
د هرات د کرنې، اوبو لګولو او مالدارۍ ریاست مسوولان وايي، د روان لمریز کال په لومړنیو درېوو میاشتو کې د غویانو ۴۰۰ ټنه پوستکي له دغه ولایت څخه ترکیې ته صادر شوي دي. د هرات د کرنې، اوبو لګولو او مالدارۍ ریاست د مالدارۍ امر محمدعمر قاصد سلاموطندار ته ویلي چې هره ورځ د دغه ولایت په مرکز کې ۵۰ غویان حلالېږي او ۵۰ پوستکي یوازې په مرکز کې ترې لاس ته راځي.
د کندهار د تختهپُل ولسوالي د «بیانزو» سیمې اوسېدونکي وايي، له تېرو څه باندې شلو کلونو راهیسې د ښوونځيو نهشتون له امله نالوستي پاتې دي.
دوی وویل، د ټولنیزو خدماتو، روغتیا او د څښاک اوبو ترڅنګ، د ښوونې په برخه کې هم جدي ستونزو سره مخ دي.
د ازموینو ملي ادارې مسوولانو نن یکشنبه، چنګاښ ۳۱مه کابل کې د یوې خبري غونډې په ترڅ کې د ۱۴۰۳ کال د کانکور ازموینې پایلې اعلان کړې.
د کابل له حبیبې لېسې څخه اتلخان رحیمزوی د ۳۵۹.۶۱ نمرو په ترلاسه کولو سره، د سږني کانکور ازموینې عمومي اول نمره اعلان شوی دی.
روزګان کې د استرالیا د ځانګړو ځواکونو لهخوا د جنګي جنایتونو د قربانیانو یوشمېر کورنۍ سلاموطندار ته وايي، اسټرالیايي ځواکونو به د شپې مهال د دوی پر کورونو چاپه وهله او د کورنۍ بې ګناه غړي یې ور وژلي دي.
د یاد ولايت د چورې ولسوالي اوسېدونکى نبي، وايي چې د اسټراليايي ځواکونو د بريد په پايله کې يې د کورنۍ شپږ غړي وژل شوي او درې نور ټپيان دي.
جګد سېنګ په خوست کې يوازينی پاتې هغه افغان دی چې له تېرو څلوېښتو کلونو راهيسې، د خوست ښار سرګردان چوک ته څېرمه د سړک پر سر د خوړو مساله پلوري. د خوست ولايتي مسوولان وايي، افغان سېکان او هندوان د نورو افغانانو سره مساوي حقوق لري او پر خونديتوب يې ټينګار کوي.
د کندهار په سپین بولدک ولسوالي کې د موټرو پرزو یوه پلورنځي کې د اورلګېدنې له کبله د کاکړانو مڼډوي په نوم یو سوداګریز مرکز کې شاوخوا زره هټۍ سوځېدلي دي.
د معلوماتو له مخې، دغه اورلګېدنه د بټریو شارټۍ له کبله رامنځته شوې چې هټۍوالو ته یې په پراخه کچه مالي زیانونه اړولي دي. که څه هم تراوسه د اوښتو مالي زیانونو کره شمېر نهدی معلوم، خو هټۍوال وايي، د زیان کچه له میلیارډونو افغانیو اوښتې.
د سوداګرۍ او صنایعو وزارت ویاند عبدالسلام جواد اخوندزاده وايي، قزاقستان د اوسپنې پټلۍ له لارې د افغانستان پر صادراتو تعرفه ۵۰ سلنه کمه کړې ده.
د نوموړي په وینا، دا هوکړه په قزاقستان کې د شمالـسوېل فارمټ غونډې په څنډه کې د دغه هېواد له چارواکو سره د سوداګرۍ او صنایعو وزارت د سرپرست نورالدین عزیزي په لیدنه کې شوې ده.
د ایران د استازو جرګې د ملي امنیت کمېسیون غړی یعقوب رضازاده وايي، د افغانستان او پاکستان حکومتونه په خپلو سرحدي سیمو کنټرول نهلري او قاچاقوړونکي او ترهګرې ډلې د افغانستان او پاکستان پولو ته څېرمه فعالیت کوي. خو سرپرست حکومت ډاډ ورکوي چې ترهګرو ډلو ته اجازه نهورکوي، څو د افغانستان پولو کې فعالیت وکړي.
د پروان امنیه قومنداني مسوولان وايي چې دغه ولایت کې د تېرو درېوو میاشتو پرمهال د پاسپورټ وېش له درکه څه باندې څلور میلیونه افغانۍ عواید راټول شوي دي.
د کډوالۍ نړیواله سازمان «ایاواېم» مسوولان وايي چې د تېرو درېوو میاشتو پرمهال څه باندې نیم میلیونه افغانان له هېواده وتلي دي.
یاد سازمان په خپل یوه تازه راپور کې ویلي چې د روان میلادي کال د اپرېل او جون میاشتو ترمنځ نږدې ۵۵۰زره کسان له افغانستان څخه نورو هېوادونو ته کډه شوي دي.
د هلمند په ګرمسېر ولسوالي کې د ماشومانو لپاره د ملګروملتونو ملاتړې ادارې «یونېسف» په مالي لګښت د اوبو رسونې یوې شبکې د جوړېدو چارې پیل شوې.
د اوبو رسونې دغه شبکه د ګرمسېر په کوچیانو کلي کې جوړېږي چې چارې یې، د کلیو بیارغونې او پراختیا ریاست لهخوا پرمخ وړل کېږي.
د اوبو او برښنا وزارت مسوولانو نن پنجشنبه، چنګاښ ۲۸مه، کابل کې د یوې غونډې پرمهال له یوه کورني خصوصي شرکت سره د ۸ میګاواټه لمریزې برښنا د تولید قرارداد لاسلیک کړ.
د هلمند مرکز لښګرګاه ښار ته نږدې تازه نهرسراج ولسوالي، د نورو ولسوالیو رسمي تشکیل ته وراضافه شوې او اوسېدونکي يې د ادارې واحدونو له نشتوالي او لريوالي شکایت کوي. د دغه ولسوالي اوسېدونکي له سرپرست حکومت او ولایتي ادارې غوښتنه کوي چي د دوی غوښتنو او ستونزو ته ژره ترژره رسېدنه وکړي، څو چارې یې له ځنډ پرته مخته لاړې شي.
د ټرافیک پولیسو عمومي ریاست مسوولان وايي چې له دې وروسته په ټول هېواد کې شخصي تېزرفتار او زېړ رنګ ټکسي موتر پر واټونو د کار کولو او سوارلۍ د لېږد-رالېږد حق نهلري.
د ریاست په وینا، یوازې په نوي رنګ «فیروزهيي او سپین» موټر کولای شي چي په عامه واټونو کې کار وکړي او سوارلۍ ولېږدوي.
