غزه کې روغتیايي چارواکي وايي چې د نن سهشنبه، اګسټ ۱۳مې سهار راهیسې تر دې مهاله د اسراییلو په بریدونو کې ۳۹ کسانو خپل ژوند له لاسه ورکړی دی.
سرچینې زیاتوي چې لږترلږه ۱۹ کسان د مرستې غوښتلو پرمهال ویشتل شوي او وژل شوي دي.
د نیوزیلنډ لومړي وزیر کریسټوفر لکسون، د اسراییلو پر لومړي وزیر بنیامین نتانیاهو توندې نیوکې کړي او ویلي یې دي چې هغه «خپل عقل له لاسه ورکړی» دی.
لکسون د غزې پر تازه بریدونو سخت غبرګون ښودلی او دا یې «په بشپړ ډول د نه منلو وړ» بللي دي.
د روسیې ولسمشر ولادیمیر پوتین د شمالي کوریا له مشر کېم جونګ اون سره ټیلیفوني خبرې کړي او هغه ته یې د دې اوونۍ په جریان کې په الاسکا کې د امریکا له ولسمشر ډونالډ ټرمپ سره د پلان شویو خبرو تازه معلومات ورکړي دي.
د امریکا د بهرنیو چارو وزیر وايي چې د فلسطین حماس ډلې ته اجازه نهشو ورکولای چې پر غزې خپلې واکمنۍ ته دوام ورکړي.
د بهرنیو چارو وزیر، مارکو روبیو، په خپلو وروستیو څرګندونو کې ویلي: «نشي کېدای حماس ته اجازه ورکړو چې پر غزې خپلې واکمنۍ ته دوام ورکړي.»
د هنګري لومړي وزیر، ویکتور اوربان د جمعې د ورځې د ټاکل شوې لیدنې په درشل کې چې د امریکا ولسمشر ډونالډ ټرمپ او د روسیې ولسمشر ولادیمیر پوتین ترمنځ کېږي، ویلي دي چې روسیه د اوکراین په جګړه کې بریالۍ شوې ده. اوربان وویل: موږ داسې خبرې کوو لکه دا چې دا یوه نه ختمېدونکې جګړه وي، خو داسې نه ده. اوکراینیانو جګړه بایللې ده، روسیې دا جګړه ګټلې ده.
د سعودي ولیعهد شهزاده محمدبن سلمان د اوکراین له ولسمشر ولودیمیر زېلېنسکي سره تلیفوني خبري کړې دي.
د سعودي رسمي خبري اژانس «واس» د راپور له مخې، محمدبن سلمان او زېلېنسکي په دې تلیفوني خبرو کې د اوکراین د کړکېچ وروستي پرمختګونه څېړلي او پر نورو موضوعاتو یې هم خبرې کړې دي.
ملګري ملتونه وايي چې غزه کې د روانې جګړې او کلابندۍ له امله شاوخوا سل ماشومانو د لوږې له امله خپل ژوند له لاسه ورکړی دی.
د ملګروملتونو د بشردوستانه مرستو د همغږۍ دفتر اوچا دغه وضعیت له شرمه ډک او ویجاړونکی بللی او د بېړني اقدام غوښتنه یې کړې ده.
د اسراییلو لومړی وزیر بنیامین نتنیاهو وايي چې غزه کې به ډېر ژر نوي پوځي عملیات پیل کړي او ټينګار یې کړی چې دغه لړۍ به په چټکۍ پای ته ورسېږي.
د رویټرز خبري اژانس د راپور له مخې، نتنیاهو په امنیتي کابینه کې د غزې د نیولو جنجالي طرحې له تصویب وروسته د حماس پر ماتې او برمته شویو پر ازادېدو ټينګار کړی دی.
د ډونالډ ټرمپ مرستیال جيډي ونس وايي چې امریکا د یوه خپلواک هېواد په توګه د فلسطین د رسمیت پېژندنې لپاره کوم پروګرام نهلري.
رویټرز خبري اژانس د نوموړي له قوله ویلي: «زه نه پوهېږم چې د داسې یوې سیمې په اړه چې هلته یوه مؤثره اداره نشته، د فلسطین د دولت رسمیت پېژندل څه معنا لري.»
د اسراییلو پوځ پر غزې د بشپړې ولکې لپاره ۲۵۰زره تازه دمو سرتېرو ته د تیارۍ امر کړی دی.
د غزې نیولو لپاره د اسراییلو طرحه چې د لوېدیځو او عربي هېوادونو لهخوا په پراخه توګه غندل شوې، تازه د اسراییلو ۱۲ خبري شبکې اعلان کړی چې د دې طرحې عملي کولو لپاره ۲۵۰زره سرتیري راغوښتل شوي دي.
په یمن کې د حوثي ډله وايي چې د اسراییلو په بېلابېلو سیمو کې یې، درې اډې په ډرون ویشتلي دي.
د یادې ډلې ویاند یحیی سرېع په یوه بیان کې ویلي چې د اسراییلو په «یافا، عسقلان او بئرالسبع» کې د ډرون بریدونه کړي دي.
د امریکا ولسمشر ډونالډ ټرمپ وايي چې د روانې اګسټ میاشتې په ۱۵مه به د روسیې ولسمشر ولادېمیر پوتین سره په الاسکا کې لیدنه ولري.
هغه تمه ښودلې چې دا لیدنه به د اوکراین جګړه پای ته ورسوي. کرملین دا لیدنه تایید کړې او الاسکا یې، د یادې لیدنې لپاره ښه ځای بللی دی.
د اسراییلو پوځ وايي چې غزه کې یې د نښتو پرمهال د فلسطینۍ «الجهاد» ډلې دوه قومندانان وژلي دي.
د اسراییلو د پوځ ل لوري په خپره شوې خبرپاڼه کې ویل شوي چې د مراد ناصر موسی ابوجراد او محمود شکري الدردساوي په بېلابېلو عملیاتو کې وژل شوي دي.
د اروپا د فوټبال اتحادیې (یوفا) د فلسطین پخواني ملي لوبغاړي سلیمان العبید پر وژنه خواشیني ښودلې چې په غزه کې د خوراکي مرستو ترلاسه کولو پرمهال د اسراییلي له لوري وژل شوی دی.
د اوکراین ولسمشر ولوېمیر زېلېنسکي وايي چې د دغه هېواد اساسي قانون څخه سرغړونه نهشي کولای او په وینا یې، یرغلګرو ته به خپله خاوره ورنهکړي.
زېلېنسکي د پوتین او ټرمپ لیدنې په اړه ویلي چې اوکراین سولې ته د رسېدو لپاره رښتینو حللارو ته اماده دی. د نوموړي په وینا، د کېیف له شتون پرته هر ډول حل لاره به د اوکراین پر وړاندې حللاره وي.
د هند هوايي ځواک وايي چې د روان کال په مې میاشت کې له پاکستان سره د نښتې پرمهال یې، د هغه هېواد پنځه جېټالوتکې ویتشلي او لهمنځه وړي دي.
د هند هوايي ځواک مشر، اېپي سینګ تایید کړه چې د «سندور» په نوم په عملیاتو کې شپږ پاکستانۍ الوتکې چې پنځه یې جنګي جېټ او یوه لویه الوتکه وه، ویشتلي دي.
