د ننګرهار د کرنې، اوبولګولو او مالدارۍ ریاست مسوولان وايي چې یاد ولایت کې د ۱۸ میلیونه افغانیو په لګښت چکډېمونه جوړېږي.
د کرنې، اوبولګولو او مالدارۍ رییس مولوي محمدولي محسن وایي چې دغه چکډېومونه به د یاد ولایت په اوو ولسوالیو کې جوړ شي.
د کندهار د کرنې، اوبولګولو او مالدارۍ ریاست مسوولان وايي چې دغه ولایت کې د «طبق» ناروغي پر وړاندې شاوخوا ۲۵زره غواګانې واکسین شوي دي.
د واکسین دغه کمپاین د یاد ولایت د کرنې ریاست او د خوراک او کرنې نړیوالې ادارې په مالي ملاتړ شوی دی.
د لوګر د بدني روزنې او ورزش امریت مسوولان وایي چې د فوتسال عمومي فدراسیون له لوري د دغه ولایت په مرکز پلعلم کې د فوتسال ورزشي سیالي پيل شوې.
د هرا د سوداګرۍ او صنایعو خونې مسوولان وايي چې دغه ولایت کې د «پستې» صادرات ۲۰سلنه زیات شوي دي.
د یاد ولایت د سوداګرۍ او پانګونې خونې اجراییه امر محمدیوسف امین سلاموطندار ته وايي چې د وروستیو نهو میاشتو پرمهال له دغه ولایت د ۲۴ میلیونه او ۶۷۶زره ډالرو په ارزښت بهر ته پسته صادره شوې.
د هلمند د کرنې ریاست مسوولان وايي چې د یاد ریاست په قوره کې پر لس جریبه ځمکه د غز او شین غزي نیا لګیو د روزنې هڅې پیل شوي دي.
دغه نیالګي به راتلونکی کال د یاد ولایت په ریګي او دښتي سیمو کې د زرغونولو لپاره ولګول شي.
د هرات د چاپېریال ساتنې ریاست مسوولان وايي چې د هرات ښار خښتو بټیو مالکانو ته یې، خبر ورکړی چې خپلې بټۍ ولسوالیو ته ولېږدوي.
د یاد ریاست مسوولانو په وینا، د خښتو بټیو مالکان لس ورځې وخت لري، څو له ښارڅخه د خښتوبټۍ ولسوالیو ته ولېږدوي.
د پکتیا د کار او ټولنيزو چارو رياست مسولان وايي چې د مرکز ګردېز اړوند رباط او احمدابا ولسوالي کې ۸۰ اړمنو کورنيو باندې د خیاطي وسایلو یا کېټونه وېشلې دي.
د میدانوردګ د بدني روزنې او ورزش امریت چارواکي وايی چې د غشيوېشتلو فدراسیون له لوري د یاد ولایت په چک ولسوالي کې د ۵۰ غوره لوبغاړو ترمنځ د غشيوېشتلو سیالي پای ته ورسېدي.
د لوګر د بدني روزنې او ورزش امریت مسوولان وایي چې د والېبال فدراسیون په همکارۍ او د دغه ولایت د بدني روزنې او ورزش امریت له لوري د ۲۴ غوره لوبډلو ترمنځ د ولایت په کچه د والېبال ژمنۍ سیالي پای ته ورسېدې.
د عامې روغتیا وزارت مسوولان وايي چې د یاد وزارت سرپرست په افغانستان کې د یوشمېر نړیوالو موسسو او سازمانو له استازیو سره کتلي دي.
یاد وزارت نن شنبه، سلواغې ۱۳مه، پر خپله اېکسپاڼه یوې خپره کړې خبرپاڼه کې ویلي چې د یاد وزارت سرپرست نورجلال جلالي د «Save the Children ،World Vision ،IMC او CRS» بنسټونو له استازیو سره په خپل کاري دفتر کې لیدلي دي.
د فراه محلي مسوولان وايي چې دغه ولایت کې یوه سوداګر په خپل شخصي لګښت جومات جوړ کړی دی.
دغه جومات د فراه ښار په «دېګفروش» کلي جوړ شوی دی.
د هرات د صنعت او سوداګرۍ رییس بشېرمحمد سیرت وايي چې دا مهال دغه ولایت کې د رنګ تولید پنځه کارخونې فعالې دي او هرات د رنګ تولید برخه کې ځانبسیاینې ته رسېدلی دی.
هرات کې د افغان فیضي رنګ کارخونې رییس جمشید فیضي وايي چې دغه کارخونه په ورځ کې ۵۰ ټُنه رنګ تولیدي او د کورني بازار د رنګ اړتیا په سمه توګه برابرولی شي.
د کډوالو او بېرته راستنېدو چارو وزارت وايي چې د پاکستان له زندانونو شاوخوا ۹۱ افغان کډوال راخوشې شوې دي.
یاد وزارت نن شنبه، سلواغې ۱۳مه په یوې خبرپاڼه کې ویلي چې د یاد هېواد له بېلابېلو زندانونو ۹۱ افغان کډوال راخوشې شوي او د روانې سلواغې میاشتې په یوولسمه او دولسمه هېواد ازاد شوي دي.
په داسې حال کې چې له جګړو پاتې ماینونه لا هم له افغانانو قرباني اخلي، د پېښو پر وړاندې د مبارزې ملي ادارې مسوولان وايي، خلکو ته به له بېلابېلو لارو د ماینونو د خطرونو په اړه عامه پوهاوی ورکړي.
د دغې ادارې ویاند محمدعبداللهجان سایق وايي، دغه کمپاین به د ټلوېزیون، راډیو، د تبلیغاتي پوسټرونو لګولو او له ماینونو څخه زیانمنو سیمو ته د ګرځنده ډلو په لېږلو سره سر ته ورسوي.
د افغانستان د بیارغونې لپاره د امریکا ځانګړې پلټونکې ادارې یا سیګار د امریکا کانګرېس ته په خپل شپږشپیتم راپور کې ویلي، په افغانستان کې د داعش، د پاکستان د طالبانو تحریک یا ټيټيپي او القاعدې موجودیت د اندېښنې وړ بللی دی. سیګار ویلي، ترهګرو ډلو په افغانستان کې خپلو فعالیتونو ته دوام ورکړی او داعش هم د دغه هېواد او سیمهييزو ثبات پر وړاندې «مهم ګواښ» دی.
د زابل د عامې روغتیا رییس ډاکټر میرویس افغان وايي، د ماشومانو لپاره د ملګروملتونو ملاتړې ادارې یونېسف او د «موف» موسسې له لوري د دغه ولایت له ۴۷ روغتیايي مرکزونو سره د ۱۱۶ قلمو درملو مرسته شوې.
نوموړي زیاته کړه چې دغه درمل د کلات ښار په ګډون د ۱۱ ولسوالیو روغتیايي مرکزونو ته وېشل کېږي.
