ایران قطر کې د امریکا په پوځي اډې برید کړی

د راپورونو پر اساس، ايران په قطر کې د امريکا پوځي اډې ويشتلو لپاره پر دغه هېواد توغندي توغولي دي.
د ایران وسله‌والو ځواکونو تېره شپه (دوشنبه، سرطان دویمه) یوه بیانیه کې وویل چې سپاه پاسداران قطر کې د امریکا په العدید اډې شپږ توغندي توغولي دي.
ورته وخت کې رویټرز اژانس راپور ورکړی چې د قطر دوحې کې د چاودنو غږونه اورېدل شوي.

تېرو دوو کلونو کې ۳.۵ میلیون افغانان هېواد ته راستانه شوي

د کډوالو په چارو کې د ملګرو ملتونو عالي کمیشنرۍ «یوان‌اچ‌سي‌ار» نن دوشنبه د کډوالو نړیواله ورځ ولمانځله.
افغانستان کې د یاد سازمان رییس عرفات جمال له ګاونډیو هېوادونو د راستنیدونکو افغانانو د شمیر زیاتوالي په اړه اندیښنه څرګندوي او وايي، د ۲۰۲۳ کال له پیل راهیسې نږدې ۳.۵ میلیونه افغانان له ګاونډیو هېوادونو هېواد ته راستانه شوي.

پر اوکراین د روسیې برید؛ اووه کسان وژل شوي

د اوکراین پر بېلابېلو سیمو د روسیې د بې‌پېلوته الوتکو د بریدونو پرمهال اووه کسان وژل شوي او لسګونه نور ټپیان دي.

د اوکراین لوړپوړو چارواکو نن دوشنبه، جون ۲۳مه، ویلي چې روسیې بېګاه شپه د کېیف او شاوخوا سیمو دغه بریدونه کړي دي.

سوریه کې ځانمرګی برید؛ ۲۲ کسان وژل شوي او ۶۳ ټپیان دي

ځانمرګی برید هغه مهال شوی چې د دمشق «دویله» سیمې په مارالیاس کلیسا کې ګڼ‌شمېر خلک پر عبادت بوخت وو.

 که څه هم تراوسه د یاد برید مسوولیت کوم چا یا ډلې پر غاړه نه‌دی اخیستی، خو د سوریې کورنیو چارو وزارت ویلي، داعش وسله‌وال کلیسا ته ننوتی او ځان پورې تړلو چادوېدونکو توکو ته له چاودنې ورکولو وړاندې یې، پر خلکو ډزې کړې دي.

شمالي‌کوریا: امریکا او اسراییل د منځني ختیځ د روان تاوتریخوالي مسوول دي

پر ایران د اسراییلو او امریکا بریدونو ته په غبرګون کې شمالي‌کوریا وايي چې منځني ختیځ کې د روان تاوتریخوالي او ترینګلتیا اصلي لامل واشنګټن او تل‌ابیب دی.

د شمالي‌کوریا دولتي خبري اژانس نن دوشنبه، جون ۲۳مه پر ایران شوي بریدونه غندلي او هغه یې، د یوه هېواد د ملي ګټو او ارضي تمامیت نقض بللی دی.

ایران اسراییلو ته د جاسوسۍ په تور یو کس اعدام کړی

پر ایران د اسراییلو او امریکا د هوایي بریدونو په لړ کې د ایران حکومت وایي چې اسراییلو ته د جاسوسۍ په تور یې، یو کس اعدام کړی دی.

د ایران نیمه دولتي رسنۍ فارس نن دوشنبه، جون ۲۳مه په یوه راپور کې ویلي چې د یاد هېواد حکومت محمدامین مهدوي شایسته اسراییلو ته د جاسوسۍ په تور په دار زړولی دی.

دغې رسنۍ دغه کس د اسراییلو د موساد سایبري ډلې مشر یاد کړی چې په ۲۰۲۳کال کې نیول شوی و.

د ایران پر هوايي ډګرونو د اسراییلو برید؛ ۱۵ الوتکې له‌منځه وړل شوي

د اسراییلو پوځ ادعا کړې چې د ایران په بېلابېلو سیمو کې یې، پر شپږو هوايي ډګرونو بریدونه کړي دي.

الجزیرې خبري شبکې نن دوشنبه، جون ۲۳مه، راپور ورکړی چې په دې بریدونو کې د ایران د پوځ اړوند ۱۵ الوتکې او چورلکې له‌منځه وړل شوي دي.

اسلامي امارت پر ایران د اسراییل برید غندلی

د اسلامي امارت بهرنیو چارو وزارت ویاند عبدالقهار بلخي پر ایکسپاڼه یوه خبرپاڼه کې ویلي، د امریکا دغه ډول بریدونه په سیمه کې بې ثباتي رامنځته کوي.
خبرپاڼه کې له دواړو خواو غوښتل شوي چې د ستونزې د حل په موخه ډیپلوماسۍ ته مخه کړي.
امریکا تېره ورځ یکشنبه د ایران په دریو اټومي تاسیساتو، نطنز، اصفهان او فوردو بریدونه وکړل.

د ایران سپاه‌پاسدارانو امریکا ته د پښېمانه کېدو ګواښ کړی

سپاه‌پاسدارانو د ایران په اټومي تاسیساتو د امریکا بریدونو په اړه بیانیه کې خبرداری ورکړی چې متحده ایالت به په دغه برید پېښمانه شي.
بیانیه کې چې نن (یکشنبه، سرطان لومړۍ) خپره شوې، سیمه کې د امریکا اډو ته د اشارې ترڅنګ، له محاسبو په لوړه سطحه د پېښمانه‌ونکي ځواب ورکولو ګواښ کړی.

د متقي او اسحاق‌ډار لیدنه؛ په سوداګرۍ او ټرانزیټ خبرې شوي

د بهرنیو چارو وزارت د ویاند مرستیال ضیا احمد تکل نن (یکشنبه، سرطان لومړۍ) پر اېکسپاڼه لیکلي چې د دغه وزارت سرپرست امير خان متقي د ترکیې استانبول کې د اسلامي همکاریو سازمان د بهرنيو چارو وزيرانو د ۵۱مې ناستې په څنډه کې د پاکستان د لومړي وزير مرستيال او د بهرنيو چارو وزير محمد اسحاق ډار سره لیدلي.