د برېتانیا حکومت اعلان کړی چې د دې هېواد جګړهییزې جېټالوتکې د لومړي ځل لپاره د ناټو د هوايي دفاع په چوکاټ کې له پولنډ څخه پرواز کړی دی.
د رویټرز خبري اژانس د راپور له مخې، دا ماموریت د «ایسترن سنټري» په نوم د ناټو د نوې دفاعي ستراتیژۍ برخه ده چې موخه یې د ختیځې اروپا د هوايي حریم ساتنه بلل شوې.
د برېتانیا د دفاع وزیر جان هیلي ویلي، د یاد عملیاتو پیغام څرګند دی: «د ناټو هوايي حریم به په کلکه دفاع شي.» دا ګام وروسته له هغې پورته کېږي چې د روانې میاشتې په لومړیو کې د روسیې بېپیلوټه الوتکې د پولنډ هوايي حریم ته ننوتلې وې.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
پولنډ چې د اوکراین ګاونډی هېواد دی، د جګړې له پیلېدو راهیسې د روسي توغندیو او ډرونونو له مستقیم ګواښ سره مخ دی. ناټو په وار وار ټینګار کړی چې د غړو هېوادونو پر هوايي حریم هر ډول برید به د ټول ائتلاف پر ضد برید بلل کېږي.
کارپوهان باور لري چې د برېتانیا د جټالوتکو استول، نه یوازې د پولنډ د امنیت ضمانت کوي، بلکې مسکو ته دا پیغام ورکوي چې ناټو د هر ډول سرغړونې پر وړاندې متحد دریځ لري.