په هلمند کې د یوه پانګوال په شخصي لګښت د یوولس میلیونه افغانیو په ارزښت، د طبي زبالو د خوندي سوځولو لپاره پرمختللی «انسناتور ماشین» فعال شوی دی.
دغه ماشین پرون دوشنبه، چنګاښ نهمه، د یاد ولایت د چاپېریال ساتنې ریاست له لوري د یوې ځانګړې غونډې پرمهال ګټېاخیستنې ته سپارل شوی دی.
په دې غونډه کې د چاپېریال ساتنې ریاست رییس ملا محمدعیسی وویل: «که طبي زبالې په خلاص چاپېریال کې پاتې شي، دا کار د ګڼو خطرناکو او ساري ناروغیو د خپرېدو لامل ګرځي، چې په ځانګړي ډول ماشومان ترې اغېزمن کېږي.»
پانګوال مولوي احمد چې د انسناتور ماشین یې فعال کړی، سلاموطندار ته وایي، دا پانګونه یې د ټولنې اړتیاوو ته په کتو کړې ده.
هغه وویل: «ما هڅه کړې چې یو داسې ماشین فعال کړم چې د روغتیايي مرکزونو د کثافاتو لپاره معیاري حل وړاندې کړي. دا پروژه ما ته ۱۱ میلیونه افغانۍ لګښت درلود، خو باور لرم چې ارزښت لري.»
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
په ورته مهال د عامې روغتیا ریاست د درملو او صحي محصولاتو د څارنې عمومي مدیر، عبدالقدیر ارشاد، دغه اقدام یو مهم پرمختګ وباله. «د طبي زبالو ناسم مدیریت د روغتیا لپاره لوی ګواښ دی، خو دا نوی مرکز کولای شي دغه خطرونه راکم کړي.»
د هلمند پوهنتون استاد محمدامان احمدزی وویل، پخوا به طبي زبالې په عامو کوڅو او سړکونو کې اچول کېدې چې دا کار د ماشومانو روغتیا ته جدي زیان رساوه. «د انسناتور په فعالېدو سره تمه ده چې دغه ستونزه د تل لپاره حل شي.»
بلخوا د چاپېریال ساتنې ریاست مسوولان وايي، له دې وروسته به ټول روغتیایي مرکزونه اړ وي چې خپل طبي کثافات د اصولو مطابق لهمنځه یوسي او سرغړونکي به له قانوني چلند سره مخ شي.
هلمند کې د انسناتور ماشین فعالېدل، نه یوازې د چاپېریال خوندیتوب ته ژمنتیا ښيي، د خصوصي سکتور او عامه ادارو ترمنځ د ګډ کار بریالۍ بېلګه هم بلل کېږي.
چارواکي تمه لري چې دا اقدام به د ناروغیو د خپرېدو مخنیوي کې مهم رول ولوبوي او نور ولایتونه هم ورته ابتکاراتو ته وهڅوي.