د افغانستان په چارو کې د ملګرو ملتونو د بشري حقونو ځانګړي راپور ورکوونکي د پاکستان او اسلامي امارت ترمنځ جګړې ته په اشارې سملاسي د تاوتریخوالي کمول اړین بللي.
ریچارډ بنټ نن جمعه د دلوې ۸ / فبروري ۲۷ پر اېکسپاڼه لیکلي: «په خواشینۍ سره یو ځل بیا د پاکستان او افغانستان ترمنځ اوسنی کړکېچ په تاوتریخوالي بدل شوی.»
هغه ویلي چې د ارامۍ او د نړیوالو بشري حقونو او بشري قانون، په ځانګړي ډول د ملکي وګړو د ساتنې لپاره د درناوي غوښتنه کوي.
د اسلامي امارت ځواکونو تېره شپه د ډیورنډ کرښې اخوا د پاکستاني ځواکونو پر پوستو غچاخیستونکي بریدونه وکړل چې په کې ۵۵ پاکستاني سرتیري وژل شوي او ګڼ شمېر نور ټپیان او ژوندي نیول شوي دي.
همدارنګه دغو بریدونو کې د اسلامي امارت ۸ سرتیري هم شهیدان شوي او ۱۱ ټپیان دي.