د افغانستان بانک مسوولان وايي چې دغه بانک د تېرکال پرمهال د هېواد په کچه له بازارونو څه باندې اووه میلیارډ زړې افغانۍ راټولې او سوځولې دي.
د یاد بانک مسوولانو دغه څرګندونې نن پنجشنبه، وږي ۱۵مه کابل کې د یاد بانک د وروستیو یو کلونو لاستهراوړنو د تشرېح پروګرام کې کړې دي.
د سلاموطندار پښتو فېسبوکپاڼه وڅارئ
د یاد بانک مسوولانو وویل چې په تېرکال کې له مرکز او ولایتونو څخه، د ۷ میلیارده، ۱۸۶میلیونه او ۵۴۴ زره افغانیو په ارزښت، زاړه بانکنوټونه راټول او سوځول شوي دي. د دوی په وینا، د راکړې ورکړې برخه کې د ستونزو حل په موخه نوي بانکنوټونه هم بازار ته وړاندې شوې دي.
همداراز هېواد کې له بانکونو د افغانیو اېستلو کچه لوړه شوې او دا مهال د بانکونو پېردونکي کولای شي، اوونۍ کې ۱۵۰زره افغانۍ او ۲۰۰۰ ډالر له خپلو حسابونو ترلاسه کړي.
دغه کچه په میاشت کې بیا ۵۰۰زره افغانۍ او له بانکونو د ډالرو اخیستلو کچه هم له ۳۰۰۰ ډالرو ۶۰۰۰ ډالرو ته لوړه شوې.
د یاد بانک د معلوماتو له مخې، تېرکال کې د اغېزناکه پولي سیاستونو د پليکېدو له لارې د بهرنیو اسعارو پر وړاندې د افغانۍ ارزښت ساتل شوی او ټاکل شویو موخو ته د رسېدو ترڅنګ، د انفلاسیون د کنټرول برخه کې هم اغېزناک ګامونه اوچت شوي دي.
د تېرکال پرمهال د ډالرو پر وړاندې د افغانیو ارزښت ۱۷.۲۵سلنه لوړ شوی او د سیمې هېوادونو د پولي واحدونو په پرتله «افغانۍ» ښه ارزښت او ثبات لري.
په تېرکال کې صرافیو او د پیسو خدمتونو وړاندې کوونکو شرکتونو ته ۱۴۹ جوازونه صادر شوي چې له دې سره د صادر شویو جوازونو ټولیز شمېر ۱۷۸۰ ته رسېدلی دی.