د بلخ محلي چارواکي وايي چې د سوند توکو د بیو کنټرول او د احتکار د مخنیوي لپاره (چهارشنبه، وږي ۲۶) په مزار شریف ښار کې د سوند توکو ځانګړی بازار پرانېستل شوی دی.
په مزارشریف ښار کې د مزار هوتل د تجارتي مرکز مسوول مصطفی مهمند، د دې بازار د پرانېستلو اصلي لامل د ښو تجارتي خدمتونو وړاندې کول او په بازار کې د اسانتیاوو برابرول شودلي دي.
هغه وویل: «خوشبختانه نن یو ځانګړی بازار پرانیستل شو. د دې مرکز د فعالیت په پیل سره به نرخونه په منظم ډول ټاکل کېږي او سوداګر کولی شي، په منظمو نرخونو تېل او ګاز وپلوري. د پرانیستونکې غونډه کې سوداګرو توکي په مناسبو نرخونو لیلام کړل.»
یوشمېر محلي سوداګرو هم د دې نوښت هرکلی کړی او هیله څرګنده کړې چې دا بازار به په بیو کې ثبات، بازار ته اعتبار او پر پیرودونکو اسانتیا راولي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د بلخ یوه ځايي سوداګر، جاوید شیرزاد وویل: «دغه بازار کولای شي، مشتریانو ته د تېلو او ګازو د پېر او خرڅ لپاره روښانه او معتبر ادرس برابر کړي.»
دا په داسې حال کې ده چې په تېرو ورځو کې د تېلو په بیو کې بدلون راغلی او د راپورونو له مخې، ګاز شاوخوا درې افغانۍ او د تېلو هر لیتر قیمت له درې څخه تر شپږ افغانیو پورې لوړ شوی دی.
د یادونې وړ ده چې د یاد بازارا اصلي موخه د مصرفکوونکو د حقونو ساتنه، د تېلو د توکو د بیو شفاف کول او د احتکار مخنیوی بلل شوی دی.