د کندهار په نېش ولسوالي کې د کرنې، اوبولګولو او مالدارۍ وزارت له پراختیایي بودیجې تمویل شویو دوو مهمو پروژو څخه یوه بشپړه او د بلې پروژې تخنیکي سروې پای ته رسېدلې ده.
د نېش ولسوالي د «کنده» په سیمه کې د ۲.۶ میلیونه افغانیو په لګښت چکډېم جوړ او ګټېاخیستنې ته سپارل شوی دی. یاده پروژه د کندهار د کرنې، اوبولګولو او مالدارۍ ریاست تر رهبرۍ او د طبیعي سرچینو امریت تر څارنې لاندې، په پنځو میاشتو کې بشپړه شوې.
د سلاموطندار پښتو فېسبوکپاڼه وڅارئ
یاد چکډېم ۲۰۰ متره اوږدوالی، ۲۸ متره پراخوالی او شپږ متره لوړوالی لري چې د باراني اوبو د زېرمې، د ځمکې لاندې اوبو سطحې لوړولو او د کرنیزو ځمکو خړوبولو لپاره به مهم رول ولوبوي.
د دې ترڅنګ، د چکډېم د جوړولو پرمهال درې مسلکي او ۲۵ غیرمسلکي کارکوونکو ته د کار زمینه هم برابره شوې وه.
د سیمې بزګران او مالداران د یادې پروژې د پليکولو له امله خوښي څرګندوي او د کرنې ریاست دا هڅې ستایي.
له دې سره هممهاله، د نېش ولسوالي د “میانکو” کلي کې د دوه میلیونه افغانیو په ارزښت د سربند او پارچاوې جوړولو تخنیکي سروی بشپړه شوې او تمه ده چې د راتلونکو اوونیو په ترڅ کې یې عملي کارونه هم پیل شي.
د کرنې ریاست تخنیکي انجینیران وایي چې د سربند او پارچاوې جوړېدو سره به ۱۵ کسانو ته د لنډمهاله کار زمینه هم برابره شي.
د دې پروژې موخه د اوبو بهیر تنظیمول، کرنیزو ځمکو ته کافي اوبه برابرول، د وچکالۍ پرمهال د اوبو ذخیره کول، د اوبولګولو سېسټم اغېزمنتیا او د خاورې د فرسایش مخنیوی ښودل شوی دی.
د نېش ولسوالۍ لپاره یادې دوه مهمې پروژې د سیمې د کرنیزو فعالیتونو د پراخوالي، د بزګرانو د اقتصادي وضعیت د ښه والي، او د اوبو لګولو سېسټم د پیاوړتیا لپاره اساسي ګامونه بلل کېږي.
سلاموطندار پر اېکسپاڼه هم وڅارئ
د کرنې ریاست مسوولان وایي چې په راتلونکي کې به هم ورته پروژې پلي شي، څو د کندهار ولایت کلیوالي سیمو ته د اوبو لګولو غوره اسانتیاوې برابرې شي.