د ملګروملتونو د خوړو او کرنې سازمان (فایو) د راتلونکې اوونۍ د هوا وضعیت اټکل کړی او د سختو ورښتونو او د هوا د تودوخې د زیاتوالي په اړه یې خبرداری ورکړی دی.
فایو نن سهشنبه سلواغې ۲۸مه، د فبرورۍ له ۱۶مې تر ۲۲مې پورې د هوا وړاندوینه خپره کړې ده. د دې وړاندوینې له مخې، په لوېدیځو او سوېلي ولایتونو کې د تودوخې له زیاتوالي سره یوځای شدید ورښتونه ښايي د چټکو سطحي روانو اوبو او ځایي سېلابونو خطر زیات کړي.
د راپور پربنسټ، په لوېدیځو او سوېلي ولایتونو کې د ورښت اندازه له نورمال حد څخه لوړه اټکل شوې ده.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
په ورته وخت کې، شمالي ولایتونه او مرکزي لوړې سیمې به لاهم نسبتآ وچې پاتې شي او د منځنۍ کچې څخه به کم ورښت ولري. دا وضعیت کولای شي د کرنې او اوبو د سرچینو پر وضعیت منفي اغېز وکړي.
فایو همدارنګه ویلي چې د هېواد په کچه به هوا د معمول په پرتله ګرمه وي او د تودوخې درجه به د ۱ څخه تر ۸ سانتيګرادو پورې لوړه وي.
د دې سازمان په وینا، په سوېلي او لوېدیځو ولایتونو کې به د هوا تودوخه ان له ۲۰ سانتيګرادو څخه هم واوړي.
فایو خبرداری ورکړی چې د واورې چټک وېلې کېدل ښايي د موسم په دوام کې د واورې زیرمې او د خاورې رطوبت کم کړي چې دا چاره د کرنې، څارویو او د اوبو د مدیریت لپاره جدي ننګونې رامنځته کولای شي.