اروپايي ټولنې اعلان کړی چې د افغانستان لپاره یې د «محلي سوداګرۍ د پراختیا له لارې د ښځو اقتصادي پیاوړتیا» د پروګرام د دویم پړاو د پیل لپاره یې، ۱۰ میلیونه یورو ځانګړي کړي دي.
یادې ټولنې ویلي چې دا پروګرام به د ملګروملتونو د پراختیايي پروګرام (UNDP) له لوري د اروپايي اتحادیې په مالي ملاتړ پلي شي.
د راپور له مخې، په دې پروګرام کې به ښځې د اقتصادي فعالیتونو په بېلابېلو پړاوونو کې، په ځانګړي ډول د کوچنیو او منځنیو سوداګریو په برخه کې، د مالي او تخنیکي ملاتړ له لارې ملتیا ترلاسه کړي.
اروپايي اتحادیې ویلي: «دا پروګرام د کلتور سره سم او د شریعت له اصولو سره برابر مالي میکانېزمونه، د سوداګرۍ د پراختیا ملاتړ، مسلکي مشورې او بازارونو ته د لاسرسي اسانتیاوې ترویجوي.»
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
اروپايي ټولنې همداراز زیاته کړې چې دا پروګرام به د افغانستان په محرومو او غرنیو سیمو کې عملي شي. هغه سیمې چېرې چې د کار په ځواک کې د ښځو ونډه کمه ده او مالي خدمتونو ته لاسرسی لا هم محدود پاتې دی.
د دې ټولنې په وینا، د یاد نوښت موخه دا ده چې د ښځو اقتصادي خپلواکي پیاوړې شي او د هغوی د عایداتي فرصتونو د زیاتېدو له لارې د ټولنو پر اقتصادي ثبات مثبت اغېز واچول شي.