د سوریې د بهرنیو چارو وزیر اسعدالشیباني به روانه اوونۍ په واشنګټن کې له یوشمېر امریکایي سناتورانو او چارواکو سره وویني او د متحده ایالاتو د بندیزونو د لغوهکېدو په اړه به خبرې وکړي.
دا د تېرو ۲۵ کلونو پرمهال د سوریې لومړی د بهرنیو چارو وزیر دی چې امریکا ته سفر کوي.
د راپور له مخې، الشیباني به د پنجشنبې په ورځ له سناتور لیندسي ګراهام او نورو سناتورانو سره هم وګوري. ټاکل شوې د دغو خبرو اصلي تمرکز پر هغو بندیزونو وي چې د «سزار قانون» په ګډون د بیلابېلو قوانینو له مخې پر سوریه لګول شوي دي.
اکسیوس زیاتوي چې نوموړی به سبا د امریکا د بهرنیو چارو له وزیر مارکو روبیو سره هم وګوري. سناتور ګراهام ویلي، د بندیزونو د لغوه کېدو ملاتړ به هغه وخت وکړي، که سوریه د اسراییلو سره د امنیتي تړون پر لور رسمي ګام واخلي او د داعش ضد ائتلاف سره یوځای شي.
دا سفر داسې مهال کېږي چې د سوریې ولسمشر احمدالشرع اعلان کړی، ښايي د اسراییلو سره امنیتي خبرې په نږدې راتلونکې کې یوې پایلې ته ورسېږي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د دمشق چارواکي وایي، دا تړون به د اسراییلي هوايي بریدونو د درولو او د دې هېواد د ځواکونو له سوېلي سیمو د وتلو په ګډون، اړوند موضوعات ولري.
د امریکا د بهرنیو چارو وزارت لا تراوسه د دې سفر په اړه څه نهدي ویلي.
بلخوا رویټرز راپور ورکړی چې واشنګټن پر دمشق فشار زیات کړی، څو د ملګروملتونو د عمومي اسمبلۍ تر غونډې مخکې له اسراییلو سره یوې هوکړې ته ورسېږي.