شماليکوریا د کوریا ټاپووزمې ختیځ ساحل ته د سمندر پر لور د لنډ واټن وېشتونکي بالیستیک توغندي ازموینه کړې.
د سوېليکوریا پوځ وايي چې شماليکوریا دغه توغندي د پلازمېنې پیونګیانګ له سوېل سرېون سیمې څخه توغولي او ۴۰۰ کیلومټره په واټن مزل یې، کړی دی.
د سلاموطندار پښتو فېسبوکپاڼه وڅارئ
د جاپان حکومت هم د بالیستیک توغندي دغه ازموینه تایید کړې او د جاپان ساحلي ساتونکو راپور ورکړی چې یو توغندی په سمندر کې په هغه سیمه کې غورځېدلی چې د هېواد سمندري ځانګړي اقتصادی زون څخه بهر و.
د سوېليکوریا د ملي دفاع وزیر کېمیونګ هېون په دې وروستیو کې خبرداری ورکړی چې شماليکوریا د امریکا ولسمشریزو ټاکنو درشل کې خپل پوځي تمرینات زیات کړي دي.
د نوموړي په وینا، پیونګیانګ دغه کار د امریکا د پام جلبولو لپاره کوي.
شماليکوریا تېره اوونۍ د دغه هېواد ختیځ ساحل پر لور د لرې واټن وېشتونکي بالیستیک توغندي (ICBM) ازموینه وکړه.
د شمالیکوریا دولتي خبري اژانس ویلي و چې د اکتوبر پر ۳۱مه دا ازموینه د هواسونګ-۱۹ ایسيبياېم ازموینه وه او نوی توغندی یې “د نړۍ تر ټولو پیاوړی ایسيبياېم” توغندی وباله.