د پکتیا محلي مسوولان وايي چې دغه ولایت کې د شاوخوا څلورنيم ميليونه افغانيو په لګښت د دوه کانالونو، دوه سربندونو او محافظوي ديوالونو د جوړېدو چارې پيل شوې.
د سلاموطندار پښتو فېسبوکپاڼه وڅارئ
د پکتيا کرنې، اوبولګولو او مالدارۍ رياست څخه په رالېږل شوې خبرپاڼه کې ويل شوي چې په سيدکرم او شواک ولسواليو کې د ۴٫۵ ميليونه افغانيو په لګښت د کانالونو او محافظوي ديوالونو جوړېدو چارې پيل شوې.
په خبرپاڼه کې زياته شوې چې په شواک ولسوالي کې د ۱۵ متره په اوږدوالي يو سربند، د ۲۳ متره په اوږدوالي کانال او د ۲۳ په اوږدوالي محافظوي ديوال جوړېږي.
د خبرپاڼې له مخې، په سيدکرم ولسوالي کې به د ۱۳ متره سربند، د ۲۴ متره په اوږدوالي محافظوي ديوال او د ۱۰ مترو په اوږدوالي يو کانال جوړ شي.
خبرپاڼه کې کاږي چې يادې پروژې د ملګروملتونو د پرمختيايي پروګرام په مالي ملاتړ او د پاملرنې موسسې په تخنيکي همکاري جوړېږي.
د یادو پروژو چارې به په راتلونکې يوه نيمه مياشت کې بشپړې شي چې تر ډېره به بزګرانو ته ځمکو خړوبولو برخه کې اسانتياوې رامنځته کړي.