د امریکا ولسمشر جو بایډن ویلي چې هېواد یې د اسراییلو د هوايي دفاعي سېسټم د پیاوړتیا لپاره د توغندیو ضد یوه پرمختللې وسله (ټاډ) دغه هېواد ته ورکوي.
رویټرز خبري اژانس راپور ورکړی چې بایډن دا خبره پرون کړې او زیاته کړې یې ده چې دغه کار د ایران د توغندیزو بریدونو پر وړاندې د اسراییلو د هوايي دفاعي سېسټم د ملاتړ په موخه کوي.
د سلاموطندار پښتو فېسبوکپاڼه وڅارئ
د پنټاګون ویاند پټ رایډر ویلي چې یاده دفاعي وسله به د اسراییلو د توغندیو ضد سېسټم پیاوړی کړي. د پنټاګون ویاند ویلي: «دا د پراخو تعدیلونو یوه برخه ده چې د امریکا پوځ په وروستیو میاشتو کې د اسراییلو د دفاعي سېسټم د ملاتړ او د ایران او د هغه اړوندو وسلهوالو ډلو د بریدونو پر وړاندې د امریکایانو د ساتنې لپاره کړی دی.»
ټاډ د امریکا د بالسټیکو توغندیو ضد تر ټولو پرمختللې وسله ده چې د لرې واټن، د منځنۍ کچې او نږدې واټن توغندیو د مخنیوي لپاره کارېږي.
اسراییل د توغندیو ضد دغه سېسټم د کارولو لپاره روزل شویو ځواکونو ته اړتیا لري او امریکا ویلي چې له یاد دفاعۍ سېسټم سره به ۱۰۰ نظامي او تخنیکي ځواکونه هم ورولېږي.
په همدې حال کې د ایران د بهرنیو چارو وزیر سیدعباس عراقچي تر دې مخکې ویلي و چې امریکا اسراییلو ته د توغندیو ضد وسلې په لېږلو سره د خپلو سرتېرو ژوند له ګواښ سره مخامخوي.
عراقچي پر خپل اېکس لیکلي: «امریکا له حده زیاتې وسلې او مهمات اسراییلو ته ورکړي دي. اوس په اسراییلو کې د توغندیو ضد امریکايي سېسټمونو په عملي کېدو سره د خپلو سرتېرو ژوند له ګواښ سره مخامخوي.»
که څه هم په منځني ختیځ کې د روانې جګړې د درېدو لپاره ډېرې ډیپلوماټیکي هڅې روانې دي، خو اسراییلو ته د امریکا د هوايي دفاعي سېسټم په ورکړې سره به هلته جګړه لا زور واخلي.