د میدانوردګ امنیه قومنداني وايي چې د دغه ولایت د مرکز میدانښار اړوند د نجارانو په سرای کې د اورلګېدنې له امله ۱۸ هټۍ سوځېدلې او هټۍوالو ته نږدې دوه میلیونه افغانۍ زيان اوښتی دی.
د میدانوردګ امنیې قومنداني څخه سلاموطندار ته په رالېږل شوې خبرپاڼه کې ویل شوي چې تېره شپه شاوخوا یوه بجه د دغه ولایت د مرکز میدانښار د «نجارانو» په سرای کې اورلګېدنه رامنځته شوې او شاوخوا دوهنیم ساعته یې دوام کړی دی.
خبرپاڼه زیاتوي چې په دې اورلګېدنه کې ۱۸ هټۍ په بشپړه توګه سوځېدلي او هټۍوالو ته ۱.۸ میلیونه افغانۍ زیان اوښتی دی.
د ورکړل شویو معلوماتو پر اساس د څلور میلیونه افغانیو په ارزښت نورو مالونو د سوځېدو مخه نیول شوې.
د میدانوردګ امنیه قومنداني د اورلګېدنې لامل نهدی په ډاګه کړی، خو زیاتوي چې په دې اړه څېړنې روانې دي.