د میدانوردګ محلي مسوولان وایي چې د ملګروملتونو د خوړو او کرنې نړیوال پروګرام (FAO) له لوري د دغه ولایت په سیداباد ولسوالي کې د ۲۵۰زره امریکایي ډالرو په ارزښت د یوشمېر رغیزو پروژو چارې پیل شوې.
د دغه ولایت د سېندیزې حوزې ریاست رییس مولوي عبدالصمد حلیم وویل، دغه پروژې د سیداباد ولسوالي په شیخاباد سیمه کې د ملګروملتونو د خوړو او کرنې نړیوال پروګرام (FAO) له لوري د راتلوونکو درېوو میاشتو په ترڅ کې پلې کېږي.
حلیم زیاته کړه، په یادو پروژو کې استنادې دیوالونه او کانالونه شامل دي.
د میدانوردګ والي قاري بختیار معاذ وویل، سرپرست حکومت ژمن دی چې په ټولو سیمو کې د بیارغونې پروژې عملي کړي.
هغه وویل، په دې پروژو کې به سلګونه وزګارو کسانو ته کار زمینه برابره شي او په پام کې ده چې ورته پروژې د دغه ولایت په پآتې ولسوالیو کې هم پلې شي.
د سیداباد ولسوالي اوسېدونکي هم خوښ دي چې د ملګروملتونو د خوړو او کرنې نړیوال پروګرام (FAO) له لوري د ګڼشمېر رغنیزو پروژو کار چارې پیل شوې، خو دوي ټینګار کوي چې ورته پروژې دې په پاتې ولسوالیو کې هم عملي شي.