د لغمان د چاپیریال ساتنې ریاست مسوولان وایي، د الیشنګ ولسوالۍ د «میل درې» طبیعي ځنګلونو کې یې د چاپیریالي نظام د تقویې په موخه ١١ بیزوګان او ٢ الوتونکي خوشې کړي.
د لغمان د چاپیریال ساتنې ریاست د طبیعي میراثونو مدیر محمد فهیم صدیقي وویل، دغه بیزوګان او مرغان د کابل ژوبن څخه د چاپیریال ساتنې ملي ادارې له لوري لغمان ته راوړل شوي و چې د الیشنګ ولسوالۍ د «میل درې» طبیعي ځنګلونو د چاپیریالي نظام د تقویې او د طبیعت د تعادل ساتلو پهپار خوشې شول.
د هغه د مالوماتو له مخې، د یاد ولایت د طبیعي ځنګلونو د ایکوسیستمونو د تقويې، د طبیعت د تعادل ساتلو، د ځنګلي حشراتو او افاتو د کنټرول او غذایي ځنځیر د تقویې په موخه د چاپیریال ساتنې ملي ادارې سره په همغږۍ یاد بیزوګان او مرغان خوشې کړل.